محکمہ ڈاک اٹی اینخو سال اے ٹی ایم سروس نا بناءِ کننگک، پوسٹل سروس آتے پوسکن کننگ و پوسکن آ دور انا غٹ خواست آتون ہم گرنچ کننگ کن گام گیج کننگ انگ ءِ
اسلام آباد ۔ 27 اگست (اے پی پی) پاکستان پوسٹ انا ڈائریکٹر جنرل ڈاکٹر نصیر احمد خان پارینے کہ محکمہ ڈاک اٹی اینخو سال اے ٹی ایم سروس نا بناءِ کننگ انگ ءِ و زوت الس دا ادارہ نا سروس آتے ٹی پین جدت و نمان گچینی اوفتے نظر بریک ، پوسٹل سروس آتے پوسکن کننگ و پوسکن آ دور انا غٹ خواست آتون ہم گرنچ کننگ کن گام گیج کننگ انگ ءِ ۔ او سے شنبے نادے آ راولپنڈی جی پی او ٹی پوسٹ مین تیٹی موٹرسائیکل بشخنگ نا دود آن تران کریکہ، ہراٹی پوسٹ ماسٹر جنرل حافظ ظفرعلی ملک، ڈپٹی پوسٹ ماسٹر جنرل اعجاز احمد کھوکھر، چیف پوسٹ ماسٹر اقلیم حسین و ایلو آفیسر آک بشخ ہلکر ۔ ڈائریکٹر جنرل پارے کہ پوسٹل سروس آتے پوسکن کننگ و پوسکن آ دور انا غٹ خواست آتون ہم گرنچ کننگ کن گام گیج کننگ انگ ءِ ۔ دا بارواٹی معلومداری کن پوسٹل ایپ انا جاری کننگ بے کچ اہمیت تخک ۔ اوپارے کہ 11شارتیٹی پک اپ سروس آتا آسراتی فراوان کننگانے ۔ چندی شار تیٹی سیم ڈے ڈیلیوری سروس نا اجراء مسنے ۔ 150 ملک آتے کن 72گھنٹہ غاتے ٹی ڈاک انا بشخ وپانٹ کن ای ایم ایس پلس سروس نا بناءِ کننگانے تانکہ الس ترند ترین جہانی سروس آتیان ہم فائدہ ہرفنگ کے ۔ اوپارے کہ پاکستان پوسٹ مالی ہدف آتا ودکی نا دوئی کننگ اٹ غٹ ءِ پدی ہلانے و دا الس نا پت انا درشان ءِ ۔ ڈاکٹر نصیر احمد خان عملہ غان تران کرسا پارے کہ پوسٹ مین محکمہ ڈاک انا مخ انا ملی نا حیثیت تخک و ادارہ نا شونداری و نیک نامی کن پبی کڑد ادا کیر ۔ موٹرسائیکل آتا فراوانی نا چرجوئی پین وخت اس ہم برجاسلک ہراڑان ڈاک انا بشخ وپانٹ اٹی ترند ی و نمان گچینی بریک و زوت پین موٹرسائیکل مچ آ ملک اٹی بشخنگک ۔ ڈائریکٹر جنرل جی پی او کمپاءونڈ اٹی نیال اس ہم خلک ۔
