ٹرانسپورٹر آتے زیزاریفوک آ کارندہ غاتا برخلاف سخت ایکشن ہلنگ ناپارت
اسلام آباد۔ 26 اگست (اے پی پی) وزیراعظم عمران خان نا کماشی ٹی نیشنل ہائی ویز سیفٹی آرڈیننس 2000ء نا نفاذ، کانود آ عمل درآمد نا چرجوئی ٹی تعلقدار کڑدہ غاتا گڑتی و اوفتا ازالہ کن آخبتی نا لائحہ عمل اسے نا بابت بڑزکو کہولی دیوان دوشنبے نادے آ مس۔ دیوان اٹی وزیر مواصلات مراد سعید، سلاہکار خارجہ عبدالرزاق داؤد، و وزارت مواصلات و وزارت صنعت وواپار نا سینئر آفیسر آک بشخ ہلکر۔ دیوان اٹی نیشنل ہائی ویز سیفٹی آرڈیننس 2000نا نافذ کننگ خاص کر ایکسل لوڈ انا بابت تعلقدار کڑدہ غاتا گڑتی و عدالتی پرمان تا سرجم جاچ ءِ ہلنگا۔ سیکرٹری مواصلات جواد رفیق نیشنل ہائی ویز سیفٹی آرڈیننس 2000ء نا نافذ کننگ نا رداٹ داوخت اسکان پیش رفت، ملکی روڈ آتا ساڑی حالیت، ذرائع مواصلات بشمول پاکستان ریلویز نا رسید و ترسیل نا بابت کچ انا حالیت، ایکسل لوڈ انا بابت کانود نا نفاذ نا معیشت آاثرات و تعلقدار کڑدہ غاتا گڑتی تیا سرجم بریفنگ تس۔ وزیراعظم ءِ پاننگاکہ سڑک آتا جوڑ جاڑ و خیالداری نا رداٹ نیشنل ہائی وے اتھارٹی ءِ سالانہ 65ارب روپئی نا خڑچ سگوئی تمک۔ ٹرک آتا منظور مروک لوڈ آن بیدس ودکی بھاریم شاغنگ نا سوب آن نئے بیرہ روڈ آک پنرہ بلکن دا شکست آتا سوب ہم مریک ہراڑان نہادی جان تا زیان مریک۔ وزیراعظم دیوان آن تران کرسا پارے کہ نیشنل ہائی ویز سیفٹی آرڈیننس 2000ء نا نفاذ سڑک آتے رکھ کننگ اٹ کمکار مریک ولے داکانود آ عملدرآمد اٹی تعلقدار کڑدہ غاتا گڑتی، روڈ آتا انفراسٹرکچر، ذرائع نقل و حمل نا کچ و ملکی معیشت خاص کر ہر بندغ آ اونا اثرآتے مون آ تخنگ المی ءِ۔ وزیراعظم پارے کہ ذرائع نقل و حمل نا ساڑی ناکافی ذرائع و ملکی معیشت نا ساڑی حالیت داہیت انا متقاضی ءُ کہ کانود اسے نا نافذ کننگ آن مست داہیت آ خصوصی چکار کننگے کہ اونا دمدستی اطلاق آن صنعت وواپار خاص وڑاٹ لس بندغ آ ہچ وڑنا ودکی بھاریم اس تمپ۔ وزیراعظم پارے کہ دا غٹ عوامل آتے مون آ تخسا المی ءِ کہ دا رداٹ غٹ راستکی تے بڑزکوعدلیہ نا مون آ پیش کننگے و کانود نا مرحلہ وار نافذ کننگ نا خواست کننگے۔ وزیراعظم پارے کہ عدلیہ تون رجوع کننگ تون اوار اوار ملک اٹی ذرائع نقل و حمل نا کچ خاص کر ٹرک آتا کچ و ریلوے نا کچ ءِ ودفنگ آ ہم چکار کننگے۔ دیوان اٹی ٹرانسپورٹر آتے مون تروک ویل خاص کر رشوت ستانی و اوفتے کارندہ غاتا کنڈآن زیزاریفنگ نا غاوتیا ہم سرجم گپ و تران مس۔ ٹرانسپورٹر آتے مون تروک ویل آتا سخت نوٹس ءِ ہلسا وزیراعظم پارت کرے کہ دارداٹ اسہ مفصل ءُ پلان اس جوڑ کننگے تانکہ ٹرانسپورٹر آتے زیزاریفوک کارندہ غاتا برخلاف سخت ایکشن ہلنگ مرے۔
