کوئٹہ۔ 26 اگست (اے پی پی) ایمر جنسی آپریشن سینٹر بلوچستان نا کوآرڈنیٹر راشد رزاق پارینے کہ مچ آ بلوچستان اٹی پولیو مہم نا بناءِ کننگانے، پولیو مہم اٹی پنچ سال اسکان نا وئی نا 10 لکھ آن زیات چناتے پولیو نا پڑی کنفنگ نا ہدف ءِ مقرر کننگانے، پولیو مہم اٹی 4 ہزار 460نا خڑک ٹیمک بشخ ہلیرہ وخت اس کہ 3 ہزار 732 موبائل ٹیم 265فکسڈ سائیڈ و 383ٹرانزٹ ٹیم اوار مریرہ۔ داخیال آتا درشانی ءِ او پولیو مہم اٹی میڈیا تون گپ و تران کرسا کرے۔ ایمر جنسی آپریشن سینٹر بلوچستان نا کوآرڈنیٹر راشد رزاق پارینے کہ بلوچستان تون اوار ملک انا ایلو بشخ آتے ٹی ساڑی آ پولیو کیس آتا رپورٹ مننگ آن پد بلوچستان اٹی خصوصی پولیو مہم نا بناءِ کننگ انگ ءِ، بلوچستان نا 7 ضلع غاتے ٹی 7 دے ئی خصوصی پولیو مہم بناکرینے، 26 اگست آن کوئٹہ و پشین اٹی 28 اگست آن نصیر آباد، جعفر آباد، جھل مگسی، صحبت پور وخت اس کہ قلعہ عبداللہ ٹی 2 ستمبرآن پولیو مہم نا بناءِ کننگک۔ اوپارے کہ بلوچستان اٹی اینخو سال پولیو نا چار کیس مون آ بسنو، اِرٹ قلعہ عبداللہ، اسٹ اس کوئٹہ اسٹ اس جعفر آباد اٹی رپورٹ مسنے ہرافتا بنداو آ پولیو نا خصوصی مہم بناکننگ انگ ءِ۔ پولیو مہم اٹی پنچ سال اسکان نا وئی نا 10 لکھ آن زیات چناتے پولیو نا پڑی کنفنگ نا ہدف ءِ مقرر کننگانے۔ ایمر جنسی آپریشن سینٹر بلوچستان نا کوآرڈنیٹر راشد رزاق مستی پارے کہ پولیو مہم اٹی 4ہزار 460 نا خڑک ٹیم بشخ ہلیرہ وخت اس کہ 3ہزار 732موبائل ٹیم 265فکسڈ سائیڈ و 383 ٹرانزٹ ٹیم اوار مریرہ۔ یات سلے کہ مچ آ دنیا ٹی پاکستان و اوغانستان ہمو ملک آتے ٹی اوارو ہراڑے پولیو وائرس داسکان ساڑی ءِ، اینخو سال پاکستان اٹی پولیو نا 53کیس مون آ بسنے ہراکہ ننکن اسہ چیلنج اسے ہرانا برخلاف نن غٹ ءِ اواری اٹ تینا کڑد ءِ ادا کروئی مریک۔ خاص کر لمہ و باوہ غاتیان خواست ءِ کہ او منفی پروپیگنڈہ غاتیا خف توپس انتئے کہ ساڑی ہی ٹی مروک آ کیس آتا اسہ بھلا سوب کمک کپننگ ہم ارے۔
