اسلام آباد ۔ 23اگست (اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ معیشت نا گچینی و زالبول نا با اختیاری حکومت نا اولیت ءِ و جیمز اینڈ جیولری نا بشخ اٹی زالبول آتا اوار مننگ و معاشی محاذ آ اوفتے با اختیار کننگ اٹ راولپنڈی چیمبرز آف کامرس و ٹریڈ ڈویلپمنٹ اتھارٹی آف پاکستان نا کڑد سفت نا قابل ءِ، کاروباری برادری جہانی محاذ آ مقبوضہ کشمیر اٹی بھارتی جارحیت ءِ پاش کننگ اٹ ہم تینا کڑد ءِ ادا کے ۔ پاکستان نا قطبی علاقہ غاک نہادی خل و معدنی کوڑی تیان ہمپوک ءُ علاقہ ءُ ۔ ٹیکنالوجی نا گدریفنگ آن دانوادرات آتیان نہادی زرمبادلہ کٹیا کننگ مریک، وزیراعظم عمران خان نا کماشی ٹی ملکی معیشت سہی سمت آ روان مسنے، حسابات جاریہ نا نسخان 2019ء ٹی کم مرسا 579ملین ڈالر آ بسنے، ہرا 2018ء ٹی 2;46;1 ارب ڈالر ئس ۔ داخیال آتا درشانی ءِ او جمعہ نادے آ راولپنڈی چیمبر آف کامرس اینڈ انڈسٹری ٹریڈ ڈویلپمنٹ اتھارٹی آف پاکستان نا اواری اٹ داڑے اسہ ہندی ءُ ہوٹل اسے ٹی اڈ ہلوک آ مسہ دے ئی جیمز اینڈ جیولری نا نمائش نا بنائی دود آن تران کرے ۔ دود اٹی کاروباری برادری نہادی خل، زیورو نہادی نوادرات آتا نمائش کنندگان تا بھلو کچ اسے آن بیدس پاکستان اٹی چندی ملک آتا سفیر و درملکی سینئر سفارتکار آتا بھلو کچ اسے ٹی بشخ ہلکر ۔ خصوصی کمکار پارے کہ زالبول پاکستان نا جہد اٹی کلیدی کڑد ادا کرے و دا وزیراعظم عمران خان نا وژن ءِ کہ زالبول ءِ با اختیار کننگے تانکہ او تعمیر پاکستان اٹی تینا نمان کڑد ءِ ادا کننگ کیر ۔ اوپارے کہ ہراوڑ گودی فاطمہ جناح تحریک آجوئی ٹی قائد اعظم محمد علی جناح نا ہم کوپہ سلیس و بروک آ چین تیکن اواسہ کلہو اس ہلا کہ اسہ قوم اس ہم زالبول آتا گچین اوار مننگ آن بیدس شون ہلنگ کپک ۔ اوپارے کہ پیشن نا ملک معاشی محاذ آ کاروباری برادری ہراڑے تینا کاروبار ءِ شون تننگ اٹ کڑد ادا کیر ہموڑے او مقبوضہ کشمیر نا کودک ایلم و ایڑھ تا سفارتکاری و بھارتی مکروہ چہرہ ءِ پاش کننگ اٹ ہم کڑد ادا کیر ۔ خصوصی کمکار حوالکاری و شینکاری ملائیشیا نا شونداری نا مثال ءِ ترسا پارے کہ ملائیشیا نا مہاتیر محمد زالبول نا 100 درسد خواندگی آ چکار کرے و ہموجاگہ نا زالبول مون آ برسا ملائیشیا ءِ شون ہلوک اسلامی ریاست اس جوڑ کننگ اٹ کڑد ادا کریر ۔
