اسلام آباد ۔ 23 اگست (اے پی پی) چیئرمین سینیٹ محمد صادق سنجرانی پارینے کہ سوگو و شونہال اوغانستان نئے بیرہ پاکستان بلکن سویلی ایشیائی ڈیہہ کن بے کچ المی ءِ انتئے کہ اوغانستان اٹی امن و ایمنی نا گچینی آن پاکستان تون اوار مچ آ ڈیہہ نا امن گنڈوک ءِ ۔ اوداخیا ل آتا درشانی ءِ پارلیمنٹ ہاءوس اٹی اوغانستان نا پارلیمانی ڈل اتون اوڑدہی ٹی گپ و تران کرسا کرے ۔ سینیٹ سیکرٹریٹ آن جاری مروک آ اعلامیہ نا رداٹ پارلیمنٹ ہاءوس اٹی مروک آ دا اوڑدہی ٹی ہڑتوم آ کنڈآک معاشی کمکاری و علاقائی رابطہ غاتے مرکزی اہمیت تننگ نا گرج آ زور شاغار و ہڑتوم آ ملک آتا نیام اٹ پارلیمانی تعلقداری تے سوگو کننگ کن پبی گام گیج چست کننگ آ امنا کننگا ۔ چیئرمین سینیٹ پارے کہ اوغانستان نا ویل واک انا کاریم اٹ اتنگ نا جاگہ غا ہیت وگپ اٹ ایسر کننگ نا گرج ءِ و داعمل نا سرکڑدہ ہی ءِ بایدے تینٹ اوغانستان ءِ کروئی مرے ۔ اوپارے کہ پاکستان تین پہ تینی تکریم اسیجائی فائدہ و نیام تمپننگ نا پالیسی آ باور کیک و نن اوغانستان اٹی سوگو حکومت نا است خواہ اُن ہراڑکن پاکستان نا ہچ ءُ پسند نہ پسند اس اف ۔ اوغانستان نا خلقت ءِ تینا ویل آتا ایسری کن تینٹ کلیدی کڑد ادا کروئی مریک و پاکستان امن کن ہروڑنا کمک فراوان کننگ ءِ ۔ اوپارے کہ پاکستان اوغانستان اٹی امن نا بابت جاری مذاکرات نا است بڈ نتیجہ غاتے کن پراومیت ءِ و کہ دا چرجوئی ٹی مثبت پیش رفت و نتیجہ مون آ بریک ۔ اوپارے کہ اوغانستان کن پاکستان غٹ آن گچین و قدرتی کمکار نا وڑاٹ ساڑی ءِ ہراکہ نئے بیرہ تعمیرنو و بحالی ٹی پبی کمک کننگ کیک بلکن تین پہ تینی اقتصادی رابطہ غاتا سوگوی کن معاشی کمکاری کن ہم ہروخت تیار ءِ ۔ اوپارے کہ پارلیمانی ڈل انا ہن و بر آن مست آن ساڑی برادرانہ تعلقداریک پین سوگو مریرہ و اسہ ایلو نا نیام اٹ غلط فہمی تا ازالہ ءِ کننگ اٹ کمک رسینگک ۔ چیئرمین سینیٹ اوغان پارلیمانی ڈل انا ایوان بالا نا سلہ غا پاکستان نا دورہ بے کچ اہمیت تخک ۔ اوپارے کہ نن اسہ ایلو نا آزموندہ غاتیان بایدے فائدہ ہرفن تانکہ ہڑتوم آ ملک آتے ٹی شونداری نا کسرآک ملنگر ۔ پاکستان حکومت ریاست و الس سدائی آن اوغانستان ایلم تتون ہر مشکل اٹی سلوک مسنو و پین وخت اس ہم دا تسلسل برقرار سلک ۔ ننے دا پہہ مننگ نا گرج ءِ کہ پاکستان و اوغانستان اسہ ایلو کن لازم و ملزوم ءُ ۔ اوپارے کہ نن اوغانستان اٹی شونداری و شونہالی نا است خواہ اُن و خوانہ کہ ہڑتوم آ ملک آتیٹی کمکاری نا پوسکن ءُ کسر پٹنگے و اوغانستان ءِ پیشن نا ملک آتا جاگہ غا واپار نا بشخ اٹی پاکستان ءِ اولیت تروئی مرے ۔ نن خوانہ کہ اوغانستان و پاکستان نا ورناچین نا نیام اٹ رابطہ سوگو مرے دا چرجوئی ٹی چندی اسیجائی پروگرام اڈتننگ نا گرج ءِ ۔ چیئرمین سینیٹ پارے کہ مقبوضہ کشمیر اٹی مسلمان تیا ظلم مننگ ءِ و اومیت ءِ کہ اوغانستان دا چرجوئی ٹی کشمیری ایلم تا پبی کمک ءِ کے ۔ اوپارے کہ پارلیمنٹ نا اسیجاڈل آتے جتا ملک آتیا مون تننگک تانکہ کشمیری تیا مروک آ بیدادی ءِ مچ آدنیا ٹی تالان کننگ مرے و اوغانستان نا اہمیت نا رداٹ فیصلہ کننگانے کہ ای بطور چیئرمین سینیٹ و اسپیکر قومی اسمبلی اسیجا وڑاٹ اوغانستان نا دورہ ءِ کینہ تانکہ اوغانستان نا پارلیمنٹ نا باسک الس و غٹ تعلقدار بشخ آتا نمائندہ غاتے کشمیر اٹی بھارتی بربریت آن معلومدار کننگ مرے و اومیت ءِ کہ اوغانستان دا چرجوئی ٹی پبی کمک کیک ۔ داوخت آ گپ و تران کرسا سینیٹ اٹی قائد ایوان سینیٹر شبلی فرازپارے کہ پارلیمانی ڈل آتا ہن و بر نا مسخت ہڑتوم آ ملک آتا تعلقداری تے پین سوگو کننگ و اسہ ایلو نا آزموندہ غاتیان فائدہ ہرفنگ ءِ ۔ اوپارے کہ نن اوغانستان تون دا ایلمی تعلقداری تے پین گچین کننگ خوانہ و ہمسایہ مننگ نا ناطہ نن اسہ ایلو نا پبی بایدے کمک کین ۔ اوپارے کہ ہڑتوم آ ملک آتے ٹی امن مریک تو ڈیہہ ءِ شونہالی نصیب مریک ۔ سینیٹر بیرسٹر محمد علی سیف گپ و تران کرسا پارے کہ ننا قدر ، دین، دودوربیدگ، نسلی تعلق بھاز سوگو ءِ و نن ویل آک ہم اسٹ ءُ ۔ ہنداخاطران نن بایدے تینا ویل آتا ایسر اس اسیجا کشن ۔ داوخت آ سینیٹر ڈاکٹر مہرتاج روغانی ہم تینا خیال آتا درشانی ءِ کرے ۔ چیئرمین سینیٹ نا کمک ءِ کروک آ ایلو سینیٹر آتے ٹی سلیم ضیاء ، لیاقت تراکئی و مومن خان آفریدی ئسک اوار ئسر ۔ 6 باسکی اوغان پارلیمانی ڈل انا سروک سینیٹر فیض خان وکیلی داوخت آ گپ و تران کرسا دورہ نا سلہ و مہمان نوازی آ چیئرمین سینیٹ و سینیٹ نا باسک آتا منت واری ءِ ہرفے ۔ اوپارے کہ اوغان جہاد اٹی ہراوڑ پاکستان اوغان باہوٹ آتا خذمت ءِ کرے اونا دنیا ٹی مثال ملیپک ۔ اوپارے کہ اوغانستان اٹی انفراسٹرکچر نا گچینی کن ہم پاکستان نا کڑد سفت نا قابل ءِ و نن خوانہ کہ دادے اوغانستان نا پسماندہ علاقہ غاتسکان ودفنگے ۔
