اسلام آباد ۔ 23 اگست (اے پی پی) وزیر خارجہ شاہ محمود قریشی پارینے کہ بھارت مقبوضہ جموں و کشمیر اٹی اسہ کنڈی وڑاٹ آبادی نا تناسب ءِ بدل کننگ خواہک، جاپان کودک کشمیری تے بھارتی بربریت آن بچفنگ و ڈیہہ ٹی امن وسوگوی کن تینا کڑد ءِ اداکے ۔ ترجمان دفترخارجہ نا رداٹ وزیر خارجہ جمعہ نادے آ تینا جاپانی ہم منصب تاروکونو تون ٹیل فون آ رابطہ کرے ۔ ہڑتوم آ وزیر خارجہ غاک ہیت وگپ اٹی مقبوضہ جموں و کشمیر اٹی جاری انسانی حق انا سنگین خلاف ورزی و ڈیہہ ٹی امن و ایمنی نا مخدوش حالیت آتیا گپ و تران کریر ۔ وزیر خارجہ شاہ محمود قریشی تینا جاپانی ہم منصب ءِ مقبوضہ جموں و کشمیر اٹی بھارت نا کنڈآن کروک آ اسہ کنڈی گام گیج و اوفتے ٹی ڈیہہ نا امن و ایمنی ءِ مون تروک گڑتی تیان معلومدار کرے وپارے کہ بھارت مقبوضہ جموں و کشمیر اٹی اسہ کنڈی وڑاٹ آبادی نا تناسب ءِ بدل کننگ خواہک ۔ مقبوضہ جموں و کشمیر اٹی 5اگست آن پدریسہ کرفیو ءِ ہرانا سوب کشمیری تے خور و دوائی تا بھاز کاختی نا مون تروک ءِ ۔ اوپارے کہ مقبوضہ جموں و کشمیر اٹی 9 لکھ بھارتی فوجی تا ساڑی گری داہیت انا شاہدی ءِ کہ بھارت مقبوضہ جموں وکشمیر اٹی دتر نا ہولی کننگ خواہک ۔ حالیت آک داخہ در تشویشناک ءُ کہ جنیو سائیڈ واچ جسی جہانی تنظیم ’’جنیو سائیڈ الرٹ‘‘ جاری کننگ ءُ ۔ اینو مقبوضہ جموں و کشمیر نا خلقت کرفیو ٹی نماز جمعہ نا ادائیگی کن اُراتیان پیشن پیش تمنگ نا پڑو ءِ کرینو ، ننے داحالیت آتے ٹی بھلو کچ اسے آ کشت وخون نا گڑتی ءِ ۔ اوپارے کہ جاپان مقبوضہ جموں و کشمیر نا کودک مسلمان تے بھارتی بربریت آن بچفنگ و ڈیہہ ٹی امن و سوگوی کن تینا کڑد ءِ اداکے ۔ جاپانی وزیر خارجہ پارے کہ نن دامچ آ حالیت آتیا نظر تخانن ، جاپان انسانی حق انا پاسداری و کانود نا حکمرانی آ یخین تخک ۔
