اسلام آباد ۔ 23 اگست (اے پی پی) پولیو نا چٹفنگ کن مچ آ ملک اٹی مہم برجاءِ ، وزیراعظم عمران خان ناخصوصی پارت آتیا بنجائی دارالحکومت تون اوار صوبہ غاتیان پولیو نا پورو چٹفنگ کن گام گیج کننگ انگ ءِ ۔ خصوصی کمکار انسداد پولیو بابر عطاتینا اسہ بیان اسے ٹی پارے کہ مچ آ ملک اٹی 53پولیو کیس مون آ بسنے ۔ اوپارے کہ اینخو نا سال گیشتر پولیو کیس آتا تعلق بنوں آن ءِ ۔ پولیو آن زہمی چناتے انسداد پولیو پڑی کنفنگتنے ۔ اوپارے کہ پولیو ویکسین اسٹ انگا ایسری ءِ پولیو نا پوسکن انگا لیبارٹری اسلام آباد اٹی ءِ و ہندا پڑی تیان غٹ مسلمان ملک آتے ٹی پولیو ءِ چٹفنگانے ۔ پولیو ویکسین مسلمان ملک انڈونیشیا غان خواہفنگک اوپارے کہ اینو اسکان پولیو ویکسین آن اسہ چناسے ہم نسخان رسینگتنے ۔ اوپارے کہ ہر پولیو مہم اٹی 5 سال آن کم وئی نا چناتے پولیو نا پڑی بایدے کنفوئی مرے ۔ اوپارے کہ پولیو نا چٹفنگ کن ذراءع ابلاغ تون اوار ایلو ذراءع اٹ الس اٹی شعور تالان کننگ کن پبی مہم اس بناکننگ نا فیصلہ ءِ کننگانے ۔ اوپارے کہ 1994ء ٹی ہراتم پولیو پروگرام بناکرے ہمووخت آ پولیو کیس آتا کچ 22 ہزار ئس ہرا کم مرسا 53 آ بسنے ۔ اولمہ و باوہ غاتیان خواست کرینے کہ او تینا چناتے پولیو آن بچفنگ نا پڑی کنفسا مچ آ وئی نا معذوری آن بچفنگ کینہ ۔ اوپارے کہ مائیکرو سافٹ نا بانی بل گیٹس وزیراعظم عمران خان ءِ چھٹی اس نوشتہ کرے و خیبر پختونخوا ٹی ودوک آ پولیس کیس آتیا دیوان اس بٹنگ انگ آ وزیراعظم نا منت واری ءِ ہرفے و پولیو نا چٹفنگ اٹ کروک آ کوشست آتیا حکومت پاکستان ءِ خراج تحسین پیش کرے ۔
