اسلام آباد ۔ 23 اگست (اے پی پی) پاکستان ہندوکونسل نا سرپرست اعلیٰ و باسک قومی اسمبلی ڈاکٹر رمیش کمکار وانکوانی ’’کرشنا جنم دن ‘‘ ءِ یوم یکجہتی کشمیرنا وڑاٹ اڈتننگ نا پڑو ءِ کرے ۔ جمعہ نا دے آ تینا ویڈیو کلہو اٹی ڈاکٹر رمیش کمکار بھارتی وزیراعظم نریندر مودی ءِ ہم غرور تکبر ءِ ہلسا کشمیر کون آ دیرینہ جھیڑہ غاتا پرامن ایسری نا پارت کرے ۔ اومقبوضہ وادی کشمیر اٹی جاری بھارتی بیدادی آ ڈکھ انا درشانی ءِ کرسا پارے کہ بھارت مقبوضہ وادی ٹی مسلمان تیا ظلم انا انتہاکننگ ءِ وخت اس کہ پاکستان اٹی ہندوتے مذہبی آجوئی دوئی ءِ ۔ اوانسانی حق انا جہانی تنظیم تا چپی آ ہم سخت رنج و غم نا درشانی ءِ کرے ۔ ڈاکٹر رمیش کمکار پارے کہ مقبوضہ وادی ٹی مسلمان تے عئید انا نماز اسکان خواننگ کن ہلنگتو، جہانی برادری ءِ تینا پبی کڑد ءِ ادا کننگ نا گرج ءِ ۔ ڈاکٹر رمیش وانکوانی پارے کہ 24 اگست آ پنجاب نا علاقہ رحیم یار خان ناشار صادق آباد اٹی ہزار آ محب وطن پاکستانی ہندو کرشنا جنم دے انا مقدس تہوار ءِ اڈ ترسا مقبوضہ کشمیر نا مظلوم الس کن خصوصی پراتنا دعاہم کیرہ ۔ ڈاکٹر رمیش وانکوانی پارے کہ بروک آ مرحلہ ٹی خیبر پختونخوا، بلوچستان و آزاد کشمیر اٹی ہم پاکستانی ہندو کمیونٹی مظلوم کشمیری تا مخ تفی ٹی دود اڈ ایترہ ۔ اوکان پد میڈیا تون گپ و تران کرسا اوپیشن نا ملک رہینگوک آ پاکستانی ہندو کمیونٹی آن ہم خواست کرے کہ او بھارت نا متعصب حکومت نا اصلی چہرہ ءِ دنیا نا مون آ اتنگ کن سفارتی محاذ آ حکومت پاکستان تون پبی تفر ۔ اوپارے کہ جہانی امن و ڈیہہ نا شونداری و شونہالی کن کشمیر نا ویل انا پرامن ایسری المی ءِ ۔
