کوءٹہ ۔ 23 اگست (اے پی پی) بلوچستان عوامی پارٹی نا مرکزی راہشون صوبائی وزیر پی ایچ ای حاجی نور محمد خان دمڑ پارینے کہ وزیراعلیٰ بلوچستان میر جام کمال خان نا کماشی ٹی ساڑی صوبائی حکومت ہرا گام گیج آتے چست کرینے اوفتا مستین اٹی ہچ ءُ مثال اس ملیپک ، صوبہ ٹی امن و ایمنی الس نا جان و مال انا رکھ اکن صوبائی حکومت و غٹ سیکورٹی ادارہ غاک پبی گام گیج کننگ ءُ، بلوچستان ءِ شونداری و شونہالی نا کسرآروان کننگ ساڑی صوبائی حکومت نا اولین اولیت ءِ، وزیراعلیٰ بلوچستان میر جام کمال خان صوبائی وزیر آتون اوار صوبہ ٹی جاری شونداری ڈٹ آتے ہُننگ کن تینٹ تعلقدار علاقہ غاتیا ہِننگ ءِ، مکران ڈویژن آن پد مرحلہ وار ایلو ڈویژن و ضلع غاتا دورہ ءِ ہم کننگک ۔ داخیال آتا درشانی ءِ او صحافی تتون گپ و تران کرسا کرے ۔ صوبائی وزیر پی ایچ ای مستی پارے کہ تدوک آ 30 سال آن زیات حکومت کروک آ قوم پرست و مذہب پرست آک ننا حکومت نا اسہ سالہ حکومت آ تنقید کننگ ءُ تنقید کننگ آن مست تینا زنچک اٹ الیر ہریر کہ تینا 30 سال انا حکومت نا دور اٹی اوفک بیدس ملک آن پیشن و تہہ ٹی میرات جوڑ کننگ بینک بیلنس ءِ ودفنگ تینا رشتہ دار آتے خوش کننگ آن بیدس پین انتس کرینو ۔ اوپارے کہ وزیراعلیٰ بلوچستان میر جام کمال خان نا کماشی ٹی بلوچستان نا شونداری و شونہالی امن و ایمنی سرکاری محکمہ غاتا فعالی ، ورناتے روزگار نا وارخواہی ودی کننگ تون اوار غٹ بشخ آتے شونداری نا کسر آ روان کننگانے ۔
