چلڈرن ہسپتال کوءٹہ نا گچین و پوسکن آآسراتی تیان ہمپوک ءُ ہسپتال اسے، جان جوڑی نا بشخ اٹی ہرجاگہ غا پین اصلاحات اتنگ اُن، بلوچستان نا ہسپتال آتے ٹی ڈاکٹر آتا کمتی ءِ پورو کننگ اُن، چلڈرن ہسپتال نا سروس اسٹرکچر ءِ اول سرآن جوڑ کننگ اُن، صوبائی وزیر جان جوڑی نصیب اللہ مری

کوءٹہ ۔ 22 اگست (اے پی پی) صوبائی وزیر جان جوڑی نصیب اللہ مری پارینے کہ چلڈرن ہسپتال کوءٹہ نا گچین و پوسکن آ آسراتی تیان ہمپوک ءُ ہسپتال اسے ہراڑے مستین اٹی چکار کپننگ نا سوب مشینری تتون اوار ایلو ویل آک ئسر جرمنی نا کمک اٹ جوڑ کروک آ دا ہسپتال گچین ءُ ماڑی اسے ولے دا ہسپتال حکومتی سرپرستی ٹی بننگ تون ہی پبی وڑاٹ کاریم کننگ ءِ و نن جان جوڑی نا بشخ اٹی ہر جاگہ پین اصلاحات اتنگ اُن ینگ ڈاکٹر ز والاک تینامن مانی ءِ حکومت آ کننگ کپسہ اِرا اِرا نوکری کروک آ بندغ آتے نن ہرگز سگپنہ، داخیال آتا درشانی ءِ صوبائی وزیر جان جوڑی چلڈرن ہسپتال اٹی نیوٹریشن و ٹی بی یونٹ نا بناءِ کننگ آن پد پریس بریفنگ اٹی کرے داوخت آ ایم ایس چلڈرن ہسپتال ڈاکٹر سلیم ابڑو تون اوار ڈاکٹر نقیب و ایلو اسٹاف ہم اوار ئسر داوخت آ اونا پاننگ ئس کہ چلڈرن ہسپتال شار انا غٹ آن گچین و پوسکن آ آسراتی تیان آراستہ ہسپتال اسے چلڈرن ہسپتال ءِ 8 جولائی آ حکومت تینا تحویل اٹی ہلک، ہسپتال اٹی جہانی آب انا مشینری ساڑی ارے، ہراڑے ضرورت مس گچینی اتنگ کن گام گیج کینہ مہالو ہسپتال اٹی درمان کن بھلو فیس اس ہلنگاکہ ہرادے چٹفنگانے،بلوچستان نا ہسپتال آتے ٹی ڈاکٹر آتا کمتی ءِ پورو کننگ اُن چلڈرن ہسپتال نا سروس اسٹرکچر ءِ اول سر آن جوڑ کننگ اُن بلوچستان اٹی اسپیشلسٹ ڈاکٹر اف ہرانا سوب ایلو صوبہ غاتیان بٹنگ انگ ءِ، اومستی پارے کہ سرکاری ہسپتال آتے ٹی دوائی تا فراوانی نا ویل ءِ منہ دے اٹی ایسر مریک داوار دوائی تا ہلنگ بیرہ ملٹی نیشنل کمپنی تیان کننگ اُن تانکہ جعل سازی آن بچنگ مرے نن خلقت ءِ گچین جان جوڑی نا آسراتی فراوان کننگ خوانہ و ہچ گہس جان جوڑی نا بشخ اٹی من مانی کننگ کپک، ینگ ڈاکٹر آتا انت کہ ویل آک ئسر نن اوفتے تون مذاکرات ہم کرین ولے او تینا ضد آ سلوک ءُ نن کس اسے نا برخلاف انتقامی کارروائی کپننگ اُن انتئے کہ ننا مسخت الس ءِ جان جوڑی نا گچین آسراتی تا فراوانی ءِ ہرادے نن پورو کننگ اُن ڈاکٹر آتے پارین کہ زالبول ڈاکٹر آتے زیزاریفوک آ دوبہ دار آتے دزگیر کننگا جاست وپاست برجاءِ ہرا ڈاکٹر آک اِراجاگہ غا نوکری کننگ ءُ اوفتا برخلاف کارروائی کننگ اُن ہرا ڈاکٹر آک بے سوب برانز کیرہ اوفتا برخلاف سخت کارروائی مریک ،، نن صوبہ ٹی قومی شاہراہ تیا ٹراما یونٹس جوڑ کننگ کن گام گیج کننگ اُن نن خوانہ کہ الس ءِ جان جوڑی نا ہروڑآسراتی فراوان مرے داوخت آ چلڈرن ہسپتال نا اسہ سینئر ڈاکٹر اس وزیر جان جوڑی آن گلہ کرسا پارے کہ 16اگست آن نناتنخواہ تے بند کننگا، ہسپتال اٹی کاریم کروک آ 60سال انا وئی آن زیات والا عملہ ءِ ایم ایس کشانے ، ننے نوکری تیا دُوارہ بحال کننگے یا ننے کنٹریکٹ ایتنگے یا ننے پاننگے کہ نم 60 سال انا مسونورے ، اگہ ہنداوڑ ءِ تو ننے ریٹائر کرسا پنشن تننگے، ہراڑا صوبائی وزیر جان جوڑی ضابطہ نا کانود نا رداٹ ایسر کننگ نا باوری کرفے داکان مست او باقاعدہ ایم ایس و ایلو اسٹاف تون اوار ہسپتال نا چندی بشخ آتا معائنہ ءِ کرے و پوسکن آ یونٹس آتا بناءِ ہم کرے ۔