مقبوضہ کشمیر اٹی میڈیا بلیک آءوٹ و صحافت آ قدغن نا برخلاف بلوچستان یونین آف جرنسلٹ نا کوءٹہ پریس کلب نا مون آ برانچی مچی
کوءٹہ ۔ 22 اگست (اے پی پی) مقبوضہ کشمیر اٹی میڈیا غا پابندی نا برخلاف پاکستان فیڈرل یونین آف جرنلسٹ نا کال آ ملک انا ایلو بشخ آتیانبار بلوچستان اٹی ہم مچی مسنے و مودی حکومت آن مقبوضہ کشمیر اٹی میڈیا غا پابندی ءِ ہرفنگ نا خواست کرینے ۔ پنچ شنبے نادے آ بلوچستان یونین آف جرنلسٹ نا کنڈآن مقبوضہ کشمیر اٹی میڈیا نا بلیک آءوٹ و صحافی تیا پابندی نا برخلاف کوءٹہ پریس کلب نا مون آ اسہ برانزی مچی اس مس ہراٹی پرنٹ و الیکٹرانک میڈیا غان تعلق تخوک آ صحافیک بھلو کچ اسے ٹی بشخ ہلکر ۔ بشخ ہلوک آتا دوتیٹی پلے کارڈ و مقبوضہ کشمیر اٹی میڈیا غا پابندی نا برخلاف نعرہ خلکر، مچی نا بشخ ہلوک آتیان تران کرسا بلوچستان یونین آف جرنلسٹس نا صدر ایوب ترین و کوءٹہ پریس کلب نا صدر رضاء الرحمان ئسک پاریر کہ مقبوضہ کشمیر اٹی میڈیا بلیک آءوٹ و صحافت آ قدغن نا سوب آن ہموڑے انسانی حق انا پامالی نا واقعہ غاتے ٹی ودکی مسنے ہرا آجوئی صحافت نا خلاف ورزی ءِ، صحافی تا نمائندہ غاک اقوام متحدہ و جہانی و انسانی حق انا جہانی تنظیم تیان خواست کریر کہ او دمدستی وڑاٹ نیام تمسا بھارتی حکومت ءِ مقبوضہ کشمیر اٹی میڈیا غا خلوک پابندی ءِ چٹفنگ آ بیوس کیر، بلوچستان یونین آف جرنلسٹس نا نائب صدر سلمان اشرف اسہ قرارداد اسے نا کمک اٹ مقبوضہ کشمیر اٹی میڈیا غا پابندی نا نئے بیرہ مذمت ءِ کرے بلکن اودے ہٹاءفنگ نا خواست کرے و درملکی صحافی تے دمدستی وڑاٹ مقبوضہ کشمیر اٹی پترینگ انگ نا موکل تننگے تانکہ ہموڑے پدریسہ کرفیو آن ودی مروک آ حالیت جہانی برادری آن آشکار مننگ کے ۔
