کوءٹہ ۔ 22 اگست (اے پی پی) وزیراعلیٰ بلوچستان جام کمال خان پنچ شنبے نادے آ مکران ڈویژن نا اِرادے ئی دورہ نا اولیکو مرحلہ ٹی تربت آ سرمس، تربت آ سرمننگ آ صوبائی وزیر خزانہ میر ظہوراحمدبلیدی ، کمشنر مکران ڈویژن کیپٹن (ر) محمد طارق زہری وزیراعلیٰ بلوچستان ءِ بخیر کریر و پولیس نا چاک و چوبند دستہ اودے گارڈ آف آنر پیش کرے، صوبائی وزیر آک انجینئر زمرک خان اچکزئی ، حاجی نور محمد دمڑ ، میر سلیم کھوسہ ، چیف سیکرٹری ڈاکٹر اختر نذیر ، ایڈیشنل چیف سیکرٹری ڈٹ بندی و شونداری عبدالرحمان بزدار، بلوچستان اسمبلی نا باسک لالہ رشید بلوچ، بشریٰ رند ، ماجبین شیران و ایلوفک ہم وزیراعلیٰ بلوچستان تون اوار ئسر ۔ داکان بیدس تربت اٹی امن و ایمنی و شونداری معاملہ غاتا جاچ دیوان اٹی کمشنر مکران ڈویژن کیپٹن (ر) محمد طارق زہری وزیراعلیٰ بلوچستان جام کمال خان ءِ بریفنگ تس ۔ وزیراعلیٰ جام کمال مکران ڈویژن اٹی قومی شاہراہ و شونداری ڈٹ آتا فول پروف سیکورٹی ءِ المی کننگ نا پارت کرسا پارے کہ الس نا جان و مال انا رکھ اکن غٹ وسیلہ غاتے کاریم اٹ اتسا ہر وڑ گام گیج آتے المی کننگے وخت اس کہ شونداری ڈٹ آتا پوروی ٹی ہچ ءُ اڑاند اس بننگ کن الینگپ، جام کمال خان پارے کہ اینخو مالی سال نا بجٹ اٹی اوار پوسکن آ شونداری ڈٹ آتیا دمدستی عملدرآمد نا بناءِ کننگے ۔ بلوچستان و پاکستان نا شونداری ٹی مکران ڈویژن خاص وڑاٹ گوادر نا اہمیت مسلمہ ءِ، ملک دشمن قوت آک شونداری عمل و اہل بلوچستان نا شونہالی ءِ بے سہب کننگ خوارہ ولے شونداری ہدف آتا دوئی کننگ آن شونداری مخالف عنصر آتا ایجنڈا ءِ بے سہب کینہ ۔
