اسلام آباد ۔ 22 اگست (اے پی پی) وزیراعظم نا خصوصی کمکار و ترجمان ندیم افضل چن پارینے کہ پاکستان اٹی کشمیر کاز اکن سیوت نا سخت گرج ءِ ، دانازک وخت آ ہم اگہ نن تینا سیاسی اختلاف آتے اولیت ایتنہ تو تاریخ ننے وخت اس ہم بشخپک، قائد اعظم محمد علی جناح نا اِراقومی نظریہ نا مخالفت ءِ کروک آک اینو سجفنگ آ بیوس ءُ ۔ پنچ شنبے نادے آ ’’اے پی پی‘‘ تون گپ و تران کرسا ندیم افضل چن پارے کہ بھارت اٹی مودی آ لبرل خلقت داسہ تنقید کننگ ءِ ہالانکہ مودی نا بھیانک مون بھاز بھلو وخت اس مست پاش مسوسس ۔ اوپارے کہ پارلیمنٹ نا اسیجائی دیوان اٹی اپوزیشن نا کنڈآن ہرارویہ ءِ اختیار کننگا او داحالیت آتے بے کچ نامناسب ءِ ۔ اوپارے کہ کشمیر نا آجوئی ننکن زند و مرک انا ویل مرسا کننگ ءِ انتئے کہ بھارتی حکومت کشمیری مسلمان تیا ظلم ءِ کاٹم آن گدریفسا بھلا عید انا وخت آہم اوفتے تینا مذہبی فرض ءِ ادا کننگ کن الیتو داتسکان کہ کشمیری مسلمان عید انا نماز ءِ خواننگ کن مسیت آتسکان ہِننگ کتوس و سنت ابراہیمی نا ادائیگی آن محروم مسر ۔ اوپارے کہ مقبوضہ کشمیر نا ساڑی حالیت آک داثابت کریر کہ قائد اعظم محمد علی جناح ہرا اِرا قومی نظریہ نا بنداو آ جتا ءُ وطن اس دوئی کریسس ہمووخت اونا دا فیصلہ مسلمان تے کن بے کچ فائدہ تروک ثابت مس ہراخلقت ہمووخت قائد اعظم محمد علی جناح نا دا نظریہ نا مخالفت ءِ کریسر اینو او سجفنگ آ بیوس ءُ ۔ اوپارے کہ کشمیر نا ویل انا ایسری کن ساڑی حکومت ہر محاذ آ سرگرم عمل ءِ ۔ اواپوزیشن جماعت آتا رویہ نا بابت ہیت کرسا پارے کہ کشمیر نا ویل انا خاطر غٹ اپوزیشن جماعت آتے تینا فائدہ غاتے پد پشت تخسا فیصلہ کروئی مریک و دابے کچ حساس معاملہ غا سنجیدگی نا درشانی ءِ کروئی مریک وگرنہ تاریخ ننے وخت اس ہم بشخپک ۔
