اسلام آباد ۔ 22 اگست (اے پی پی) چیئرمین سینیٹ محمد صادق سنجرانی پارینے کہ پاکستان و متحدہ عرب امارات نا نیام اٹ تاریخی راجی و دودوربیدگی تعلقداری ءِ ہرافتے پین سوگو کننگ کن مربوط ا سیجائی کوشست کننگ نا گرج ءِ ۔ داخیال آتا درشانیءِ او پنچ شنبے نادے آ متحدہ امارات نا سفیر حماد عبید ابراہیم تون پارلیمنٹ ہاءوس اٹی اوڑدہی ٹی گپ و تران کرسا کرے ۔ اوڑدہی ٹی چیئرمین سینیٹ نا دورہ متحدہ عرب امارات نا بابت گپ و تران کننگا ۔ چیئرمین سینیٹ داوخت آ پارے کہ ہڑتوم آ ملک آتا نیام اٹ پارلیمانی ڈل آتا ہن و برآن مست آن ساڑی برادرانہ تعلقداری تے پین سوگوی ملک ۔ اوپارے کہ او متحدہ عرب امارات نا دورہ ٹی دا چرجوئی ٹی سینئر سرکڑدہ غاتون گپ و تران کیک ۔ پروگرام نا رداٹ چیئرمین سینیٹ 25آن 28 اگست آ پارلیمانی ڈل اتون اوار متحدہ عرب امارات نا سرکاری دورہ ءِ کیک ۔ چیئرمین سینیٹ ءِ دادورہ نا سلہ ءِ متحدہ عرب امارات نا حکومت خلکونے ۔ دا اہم دورہ ٹی چیئرمین سینیٹ وپارلیمانی ڈل متحدہ عرب امارات نا بڑزکو سیاسی سرکڑدہ و حکومتی سرکڑدہ غاتون اوڑدہی کیک ۔ چیئرمین سینیٹ پارے کہ دادورہ نا مسخت ہڑتوم آ برادر اسلامی ملک آتا نیام اٹ سیاسی، راجی و اقتصادی تعلقداری تا مون آ دننگ کن پارلیمانی رابطہ غاتے پین سوگو کننگ تون اوار اوار کشمیر اٹی بھارتی بیدادی و جارحیت اٹی علاقائی امن ءِ مون تروک گڑتی تیان متحدہ عرب امارات نا سرکڑدہ غاتے معلومدار کننگ و امن اٹی پاکستان نا کوشست آتے تالان کننگ ناءِ ۔ اوپارے کہ پاکستان و متحدہ عرب امارات ڈیہہ و مسلم امہ نا اہم ممبرز ءِ ۔ دا ہڑتوم آ ملک آتے کشمیر نا اہم ویل انا ایسری و علاقائی امن کن اسیجائی کوشست بایدے کروئی مرے ۔ اوپارے کہ ہڑتوم آ ملک آتا نیام اٹ معاشی کمکاری ءِ مون آ دننگ نا بے پناہ کچ ساڑی ءِ ۔ ہڑتوم آ ملک آک ڈیہہ نا شونداری و شونہالی کن اسیجائی ایجنڈاغا عمل کرسا پین گچینی اتنگ کیرہ ۔ چیئرمین سینیٹ پارے کہ گوادر ڈیہہ نا شونداری و زرکاری نا گچین وت جوڑ مسنے اونا فائدہ غاتیان متحدہ عرب امارات و ایلو علاقائی ملک آک بایدے پبی فائدہ ہرفر ۔ متحدہ عرب امارات نا سفیر چیئرمین سینیٹ نا خیالات آتیان امنا کرسا پارے کہ پاکستان ایوان بالا نا سروک نا متحدہ عرب امارات نا دورہ بے کچ اہمیت نا حامل ءِ و بڑزکو سرکڑدہ غاک دا دورہ نا چاری ءُ ۔ اوپارے کہ ننے تاریخی دودوربیدگی و مذہبی رابطہ غاتے کاریم اٹ اتسا علاقائی شونداری نا عمل ءِ مون آ دننگ کن اسیجا کوشست بایدے کروئی مرے ۔ اوپارے کہ پاکستان متحدہ عرب امارات کن بے کچ اہمیت نا حامل ءِ و نن ہڑتوم آ ملک آتا نیام اٹ تعلقداری تے سوگو کننگ خوانہ ۔
