اسلام آباد ۔ 22 اگست (اے پی پی) وزیراعظم عمران خان پارینے کہ پاکستانی ورناتیٹی بے پناہ لاءخی ساڑی ءِ و مناسب وارخواہی ملنگ آ او ہر پڑاٹ تینا لاءخی تا سکہ ءِ منفرہ، سرسہب جوان پروگرام نئے بیرہ ورناتے روزگار نا فراوانی بلکن چنکا و درمیانہ درجہ نا صنعت آتا شونداری نا مون آ دننگ اٹ ہم کمکار ثابت مریک ۔ وزیراعظم عمران خان داہیت آتا درشانی ءِ ورناتا شونداری و اوفتے کاروباری وارخواہی فراوان کننگ نا چرجوئی ٹی بناکروک آ ’’سرسہب جوان‘‘ پروگرام آ بریفنگ ہلنگ اٹی کرے ۔ پنچ شنبے نادے آ اڈ ہلوک آ دیوان اٹی دا ہیت انا فیصلہ ءِ کننگاکہ سرسہب جوان پروگرام نا ارٹ میکو مرحلہ نا باقاعدہ بناءِ ستمبر نا اولیکو ہفتہ ٹی کینہ ہرانا رداٹ یوتھ انٹرپرینیور سکیم، گرین یوتھ موومنٹ،م اسٹارٹ اپ پاکستان، انٹرن شپ پروگرام، ہنر مند ورناو نیشنل انٹر پرینیور پروگرام بناکننگک ۔ دیوان اٹی وزیراعظم عمران خان نا خصوصی کمکار امور نوجوانان محمد عثمان ڈار، خصوصی کمکار نعیم الحق، قائم مقام گورنر اسٹیٹ بینک آف پاکستان جمیل احمد، صدر نیشنل بینک آصف عثمانی، صدر بینک آف خیبر سیف الاسلام ، صدر بینک آف پنجاب خالد صدیق ترمذی ، چیئرمین نادرا عثمان یوسف مبین، چیئرمین این ٹی سی، چیئرمین این آئی ٹی بی، سی ای او سمیڈا و ایلوسینئر آفیسر آک ساڑی ئسر ۔ خصوصی کمکار امور نوجوانان محمد عثمان ڈار وزیراعظم ءِ سرسہب ورناپروگرام آ بریفنگ تس و پروگرام نا خدوخال آن سرجم وڑاٹ معلومدار کرے ۔ وزیراعظم ءِ پاننگاکہ نیشنل یوتھ ڈویلپمنٹ سٹریٹجک روڈمیپ نا اولیکو مرحلہ ٹی نیشنل یوتھ ڈویلپمنٹ فریم ورک اس مرتب کننگانے و نیشنل یوتھ کونسل اس جوڑ کننگانے ۔ ارٹ میکو مرحلہ ٹی سرسہب ورنا پروگرام نا باقاعدہ اجرا ستمبر آن کننگ انگ ءِ ۔ سرسہب ورناپروگرام نا رداٹ یوتھ انٹرپرینیور سکیم، گرین یوتھ موومنٹ، اسٹارٹ اپ پاکستان ، انٹرن شپ پروگرام ، ہنر مند جوان(اسکل فار آل) ، و نیشنل انٹر پرینیور پروگرام بناکننگک ۔ وزیراعظم ءِ پاننگاکہ سرسہب ورناپروگرام نا رداٹ اسہ خاص ءُ پورٹل اس جوڑ کننگ انگ ءِ ۔ پورٹل نا رداٹ پروگرام آن فائدہ ہرفوک آ ورناتا غٹ ریکارڈ مرکزی کہول آ جمع مننگ کیک و مستند و قابل پت ڈیٹا دوبریک ۔ مستین نا پروگرام و ساڑی حکومت نا کنڈآن جاری کروک آ سرسہب ورناپروگرام نا تقابلی جاچ ءِ پیش کرسا وزیراعظم ءِ پاننگاکہ مستین اٹی ورناتے کاروبار کن وام تننگ نا دنگ بے کچ محدود ئس ولے سرسہب ورناپروگرام نا رداٹ دانا دنگ ءِ ودفنگانے و وام تا فراوانی کن اِرادرجہ جوڑ کننگانے ۔ اولیکو درجہ بندی ٹی ورناتے تینا کاروبار اس بناکننگ کن اسٹ آن پنچ لکھ روپئی اسکان نا وام تننگک وخت اس کہ ارٹ میکو کہول آ پنچ آن پنجا لکھ روپئی اسکان نا وام تننگک ۔ سرسہب ورناپروگرام نا رداٹ ورناتے کن وام تا دوئی کننگ کن پین مسٹ میکو بندغ اسے نا کنڈآن بینک آتے گارنٹی فراوان کننگ نا شڑت ءِ چٹفنگانے و ورناک براہ راست پورٹل نا کمک اٹ بینک آتیان وام ہلنگ کیرہ ۔ دارداٹ اولیکو مرحلہ ٹی مسہ بینک (نیشنل بینک، بینک آف خیبر و بینک آف پنجاب) ورناتے براہ راست وام فراوان کیرہ ۔ وزیراعظم ءِ پاننگاکہ سرسہب ورناپروگرام نا رداٹ پورٹل نا جوڑ کننگ نا مسخت پروگرام اٹی پورو شفافیت ءِ المی کننگ و وام تا دوئی ٹی ہچ وڑنا صوابدیدی اختیار، جندی پسند ناپسند یا پین وابستگی ءِ ملحوظ خاطر اتنگ آن بیدس میرٹ نا بنداو آ وام تننگ نا ءِ ۔ پورٹل نا کمک اٹ ورناک آن لائن درخواست آتے جمع کرفرہ ہرانئے بیرہ دمدستی وڑاٹ بینک آتسکان سرمریرہ بلکن وزیراعظم آفس اٹی ہم اونا پورو ریکارڈ ساڑی مریک دا مچ آ عمل آ نظر تخنگک تانکہ شفافیت و میرٹ ءِ المی جوڑ کننگ مرے ۔ وزیراعظم ءِ پاننگاکہ سرسہب ورناپروگرام نا رداٹ پنچ سال اٹی 100 ارب روپئی اسکان نا وام کم و ود یک و نیم لکھ ورناتے فراوان کننگک ۔ وزیراعظم ءِ پاننگاکہ سرسہب ورناپروگرام نا رداٹ وام تا دوئی کننگ ءِ بے کچ آسان جوڑ کننگانے ۔
