اسلام آباد ۔ 22 اگست(اے پی پی) وزیراعظم عمران خان بھارت ءِ کیہی وار مذاکرات نا سلہ غان پد ہم ہچ ءُ مثبت ورندی اس ملیپننگ آ بے کچ است ہسونی نا درشانیءِ کرسا پارینے کہ داسہ او بھارتی ہم منصب نریندر مودی تون ہیت وگپ انا خواہندار اف ہرا مقبوضہ کشمیر نا مسلم اکثریتی ڈیہہ نا آبادیت ءِ بدل کننگ نا عزم تخک، اِرا ہمسایہ جوہری ملک آتا نیام اٹ عسکری بے چیٹی ٹی ودکی نا گڑتی ءِ، اقوام متحدہ نا امن دستہ و مبصر آتے بھارتی مقبوضہ کشمیر نا دورہ کننگ نا موکل تننگے ۔ داخیال آتا درشانی ءِ او امریکی اخبار نیو یارک ٹائمز ءِ اسہ انٹرویو اسے ٹی کرے ۔ وزیراعظم پارے کہ مقبوضہ کشمیر اٹی 5اگست نا بھارتی کریک ڈاءون آن مست و پد نن مذاکرات نا کیہی وار سلہ خلکن ولے اونا مثبت ورندی ءِ تننگتو، داسہ بھارت تون ہیت و گپ نا ہچ ءُ فائدہ اس اف، کنا مطلب ءِ کہ ای دابارواٹی بھاز ہیت و کوشست کرینٹ، ہراتم ای پدی چک خلیوہ ہریوہ تو نن امن و ہیت وگپ کن ہروڑ کوشست کرین ولے بدبختی اٹ بھارتی حکومت ننا داکوشست آتیان بیرہ تسکین دوئی کرسا کرے، داسہ نن داکان پین زیات ہچ کننگ کپنہ ۔ وزیراعظم مقبوضہ کشمیر نا حالیت آتیا مودی سرکارءِ سخت تنقید نا نشانہ کرسا پارے کہ بھارت مقبوضہ جموں و کشمیر اٹی بدامنی ءِ توننگ کن بھلو نفری اس تعینات کرینے و مچ آ علاقہ ٹی مواصلات نا پورو نظام ءِ بند کننگانے ۔ اومودی ءِ فاشٹ و ہندوبالادستی نا ذہنیت تخوک گوندا ہراکشمیر نا مسلم اکثریتی آبادی ءِ چٹفسا ہندو اکثریتی آبادی ٹی بدلیفنگ خواہک ۔ اوپارے کہ غٹ آن اہم اہیت دادے کہ 80 لکھ انسان تا زند خطرہ ٹی ءِ ۔ نن غٹ فکر مند اُن کہ اوفتا کشت و خون و نسل کشی مننگ والاءِ ۔ وزیراعظم دا انٹرویو ءِ اسہ ہندن ءُ وخت اسے ٹی تس ہراتم اسہ دے اس مست او امریکی صدر ڈونلڈ ٹرمپ تون ٹیل فون آ گپ و تران اٹی اودے پاکستان و بھارت نا نیام اٹ کشمیر نا ویل آ بے کچ بے چیٹ حالیت آتیان معلومدار کرے ۔ داڑے داہیت ہم ذکر انا قابل ءِ کہ وزیراعظم تدوک آ تُو واشنگٹن نا دورہ و امریکی صدر تون اوڑدہی کریسس ہراکشمیر نا جھیڑہ غا ثالثی نا پیشکش کریسس، ہرانا وزیراعظم خیرمقدم ءِ کرے ولے بھارت دا پیشکش ءِ امنا کتو ۔ امریکی صدر تدوک آ دے ہم اسہ انٹرویو اسے ٹی دا پیشکش نا اعادہ ءِ کرسا پارے کہ او ثالثی یا پین کڑد اس ادا کننگ کن تینا گچین کوشست آتے کاریم اٹ اتیک ۔ وزیراعظم تینا انٹرویو ٹی داہیت آ گڑتی نا درشانی ءِ کرے کہ بھارت کشمیر اٹی جعلی آپریشن کننگ کیک تانکہ پاکستان نا برخلاف فوجی کارروائی نا سوب ودی کے، ہراڑاپاکستان ورندی ءِ تننگ آ بیوس مریک ۔ اوپارے کہ اِرا جوہری ملک ہراتم مون پہ مون مریرہ تو ہروڑمننگ کیک ۔ ننکن فکر انا ہیت دادے کہ داڑان اِراجوہری ملک آتا نیام اٹ بے چیٹی ودک، دنیا ءِ بایدے ادراک مرے کہ دا حالیت خطرناک مریک ۔ نیو یارک ٹائمز پارے کہ عمران خان وزارت عظمیٰ نا عہدہ ءِ سنبھالنگ آن دمدستی پد کشمیر تون اوار ہڑتوم آ ملک آتا نیام اٹ غٹ ویل آتا ایسری کن بھارت تون مذاکرات نا بحالی کن کوشست کرے ۔ وزیراعظم عمران خان تینا انٹرویو ٹی خواست کرے کہ اقوام متحدہ نا امن دستہ و مبصر آتے بھارتی مقبوضہ کشمیر آ ہِننگ نا موکل تننگے دُن کہ مودی سرکار کشمیری مسلمان تا کشت وخون ءِ کننگ نا عزم تخک ۔
