اسلام آباد۔ 21 اگست (اے پی پی) وزارت ڈٹ بندی و شونداری ریلوے نا نظام ءِ ہندی و جہانی کہول آ ودفنگ نا بابت جامع حکمت عملی اس تینا کننگ آسجفنگ ءِ۔ خاص کر کاشغر چین آن مزار شریف، اوغانستان اسکان ریلوے نا نظام ءِ منظم کننگ نا بابت سجفنگ انگ ءِ و دا ریلوے لین ءِ حویلیاں خیبر پختونخواآن چین نا صوبہ سنکیانگ نا شار کاشغر تون گنڈنگک۔ ہنداوڑ سی پیک ڈٹ ءِ سنٹرل ایشیا تون گنڈنگ و ڈیہہ ٹی رابطہ سازی نا عمل ءِ ترند کننگ کن ریلوے لین ءِ کابل و اوکان پد مزار شریف اوغانستان تون ملفنگ نا بابت ہم سلاہ پیش کننگانے۔ یات سلے کہ ڈیہہ ٹی رابطہ سازی نا عمل ءِ ترند کننگ کن گوادر پورٹ ءِ مچ آ ملک اتون گنڈنگ خاص کر جیکب آباد و کوئٹہ ءِ بازیمہ نا کمک اٹ گوادر تون ملفنگ کن 4.5 ارب ڈالر نا خڑچ آن ریلوے لین اس تالان کننگک۔ وزارت ریلوے ٹی سی پیک پروجیکٹ نا کمامدارآتارداٹ ایم ایل ون ڈٹ ءِ ودفسا کراچی ءِ پشاور و ٹیکسلا ءِ حویلیاں تون گنڈنگ آن شونداری نا اسہ پوسکن ءُ جہت اسے نا بنامریک ہراڑان ٹیلی کمیونیکیشن سسٹم ءِ مون آ دننگ آن بیدس واپار نا نقل و حمل اٹ ہم آسانی ودی مریک۔ ہنداوڑ داڈٹ انا ودفنگ آن کراچی آن لاہور نا سفر نا 18 گھنٹہ نا دورانیہ ٹی کمتی واقع مرسا بیرہ 10 گھنٹہ ٹی پورو مریک۔
