کوءٹہ ٹی نسٹ یونیورسٹی کیمپس نا جوڑ کننگ، کچلاک ژوب شاہراہ نا اپ گریڈیشن ، ہاءوسنگ اسکیم نا رداٹ ہند آتا تفنگ نا ڈٹ آتا بناء و بنداو ءِ تخسا وزیراعظم عمران خان ثابت کرے کہ او بلوچستانءِ ایلو صوبہ غاتا بریبر اتنگ اٹی مخلصانہ کوشست کننگ ءِ
کوءٹہ ۔ 20 اگست (اے پی پی) پاکستان تحریک انصاف نا باسک قومی اسمبلی منورہ منیر پارینے کہ بنجائی حکومت بلوچستان آن احساس محرومی نا چٹفنگ کن اولیکو وار بنجائی پی ایس ڈی پی ٹی کوءٹہ و صوبہ نا ایلو علاقہ غاتیکن ارب آروپئی نا اسکیم تے جتا کرینے، کوءٹہ ٹی نسٹ یونیورسٹی کیمپس نا جوڑ کننگ، کچلاک ژوب شاہراہ نا اپ گریڈیشن ، ہاءوسنگ اسکیم نا رداٹ ہند آتا تفنگ نا ڈٹ آتا بناء و بنداو ءِ تخسا وزیراعظم عمران خان ثابت کرے کہ او بلوچستانءِ ایلو صوبہ غاتا بریبر اتنگ اٹی مخلصانہ کوشست کننگ ءِ، داخیال آتا درشانی ءِ سے شنبے نادے آ بلوچستان اسمبلی ٹی پاکستان تحریک انصاف بلوچستان نا سینئر نائب صدر سید ظہور آغا، ڈپٹی جنرل سیکرٹری بسم اللہ آغا، عنایت خان کاکڑ و ایلو راہشون آتون اوار پریس کانفرنس آن تران کرسا کرے، باسک قومی اسمبلی منورہ منیر پارے کہ بنجائی پی ایس ڈی پی ٹی بلوچستان کن تعلیم جان جوڑی ، آبنوشی، روڈ آتا جوڑ کننگ کن تاریخ اٹی اولیکو وار بھلو پیسہ اس جتا کرسا تحریک انصاف نا حکومت بلوچستان نا الس تون کروک آ وعدہ غاتے پورو کرینے وخت اس کہ کوءٹہ ٹی شوکت خانم کینسر ہسپتال نا جوڑ کننگ کوءٹہ نا قدرتی حسن ءِ دُوارہ بحال کننگ کن دہ ارب روپئی نا کوءٹہ شونداری پیکج نا پڑو و ہر باسک قومی اسمبلی کن 15کروڑ روپئی نا فنڈ جاری کننگ آن بلوچستان اٹی شونداری و شونہالی نا پوسکن آ دور بناکیک، اوپارے کہ مستین نا حکومت آک پاک چین اقتصادی راہداری ڈٹ اتون اوار ہر بشخ اٹی بلوچستان ءِ بھاز بے وڑ گوجالار ولے وزیراعظم عمران خان بلوچستان نا خلقت نا زند انا آب ءِ بڑز کننگ و اوفتا متکن آ ویل آتے ایسر کننگ کن خصوصی است خواہی ہلنگ ءِ و ہائر ایجوکیشن کمیشن آن بلوچستان نا مار و مسن تیکن خصوصی اسکالر شپ جاری کننگ، بنجائی کارپوریشن آتے ٹی نوکری تا بلوچستان نا شش درسد کوٹہ غا عملدرآمد ، احساس پروگرام و جان جوڑی کارڈ کون آ گام گیج ہرفنگ آن بلوچستان نا الس نا وزیراعظم عمران خان آ پت پین ودانے کہ حقی وڑاٹ اولیکو وار پاکستان تحریک انصاف نا حکومت غٹ بشخ آتے ٹی بلوچستان آ خصوصی چکار کرینے ہراٹی پاکستان تحریک انصاف نا پنچ سال انا حکومت آن پد بلوچستان اٹی روڈ آتا جوڑ کننگ ، جان جوڑی و تعلیم نا آسراتی تے باہم سرکننگ تون اوار غٹ بشخ آتے ٹی نمان گچینی بریک ۔
