اسلام آباد ۔ 20 اگست (اے پی پی) صدرآزادکشمیر سردار مسعود خان پارینے کہ بھارت مقبوضہ کشمیر اٹی جنگی ڈوہ انا مرتکب مننگ ءِ، دنیا امنا کرینے کہ مقبوضہ کشمیر نا معاملہ بھارت نا تہہ نا ویل اف، بھارت کشمیر اٹی نسل کشی نا بناءِ کرینے، مقبوضہ کشمیر اٹی دوائی و خور انا بھاز کمتی ءِ ۔ داہیت ءِ او سے شنبے نادے آ داڑے پریس کانفرنس کرسا پارے ۔ اوپارے کہ کشمیر نا ویل ءِ ایسر کننگ سلامتی کونسل نا زمواری ءِ، مقبوضہ کشمیر اٹی بھارت نا کارروائیک مذمت نا قابل ءُ ، بھارت مقبوضہ کشمیر ءِ جیل و جنگ انا میدان اٹ بدل کرینے، بھارت نئی دہلی آن مقبوضہ کشمیر آ براہ راست حکمرانی کننگ خواہک ۔ صدر آزاد کشمیر سردار مسعود خان پارے کہ بھارت مقبوضہ کشمیر نا خلقت آن غٹ انسانی حق آتے پلانے، دزگیر کشمیری تیا بھارتی فوج بدترین بیدادی کننگ ءِ ۔ اوپارے کہ پاکستان ءِ دفاعی وڑاٹ چوکنا سلوئی مریک، بھارت کون آ دشمن آن امن نا اومیت کننگ مفک، کشمیری قوم پاکستان نا دفاع کن مون اٹ مریک ۔ صدرآزاد کشمیر پارے کہ حوال آک ءُ کہ بھارت شش ہزار کشمیری دزگیر کرینے و بھارتی میڈیا ءِ مقبوضہ کشمیر اٹی بدترین حالیت آتیا ہیت کننگ آن توننگانے، بھارتی لیڈر شپ انا بیان ریکارڈ آ ساڑی ءِ کہ نن پاکستان آدہشت گرد مون ایتینہ ۔ اوپارے کہ بھارت دوبہ خلنگ کیک کہ سیم انا ایپار آن دہشت گردی مننگ ءِ ولے شاہدی اف، چور مچائے شور والا کسہ ءِ ہراکہ بھلو وخت اسے آن بنفنگ انگ ءِ ۔ اوپارے کہ بھارت مقبوضہ کشمیر اٹی دہشت گردی نا واقعہ کرفسا دوبہ ءِ پاکستان آ خلیک ۔ بھارتی جارحیت نا مقابلہ ءِ کننگ کن قوم بایدے تیار مرے ۔ صدر آزاد کشمیر سردار مسعود خان پارے کہ نہرو کشمیر اٹی فوج گدریفنگ نا مخالفت داکہ کریس کشمیر نا خلقت بہادر و سوگو اعصاب نا مالک ءُ، دا اگہ بش مسر تو پدی اوپسہ، اوپارے کہ پاکستان و کشمیر نا خلقت لمہ وطن نا دفاع ءِ کیرہ و غٹ بھارتی عزم آتے بے سہب کیرہ ۔
