اسلام آباد ۔ 20اگست (اے پی پی) صدر مملکت ڈاکٹر عارف علوی بنائی طبی امداد نا فراوانی نا بابت انجمن ہلال احمر پاکستان نا خذمت آتا ستاءِ کرسا داہیت آ زور شاغاکہ داوخت بیرہ 2 درسد پاکستانی دتر نا عطیہ ایترہ، دا چرجوئی ٹی مسیت آتون اوار چندی دوئی فورم تا کمک اٹ خلقت ءِ متحرک کننگ نا گرج ءِ ۔ داخیال آتا درشانی ءِ او سے شنبے نادے آ ایوان صدر اٹی انجمن ہلال احمر پاکستان نا بریفنگ اٹی کرے ۔ اوپارے کہ انجمن ہلال احمر پاکستان نہادی انسانی جان تے بچفنگ کن فرسٹ ایڈ سروسز نا کمک اٹ نمان خذمت سرانجام تننگ ءِ ۔ صدر مملکت پارے کہ انجمن ہلال احمر پاکستان اٹی انسانی امداد نا نمان تنظیم ءِ ہرانا ایلو ملک آتا تنظیم آتون شریداری ءِ، دا تنظیم ءِ ملک اٹی نجی بشخ انا داوڑنا ایلو تنظیم آتون اواری اٹ نیٹ ورکنگ اٹی تینا مرکزی کڑد ءِ ادا کروئی مرے ۔ اوپارے کہ انجمن ہلال احمر ءِ صوبائی حکومت و ایلو تعلقدار تنظیم آتون اواری اٹ صوبہ غاتے ٹی رضاکار و کارندہ غاتا کاریم نا کچ اٹی ودکی خاص کر بنائی طبی امداد نا فراوانی ٹی تینا بایدے کڑد ءِ ادا کیر ۔ اوپارے کہ داوخت بیرہ 2 درسد پاکستانی دتر نا عطیہ ایترہ، دا چرجوئی ٹی مسیت آتون اوار جتا دوئی فورم تا کمک اٹ خلقت ءِ متحرک کننگ نا گرج ءِ ۔ اوپارے کہ انجمن ہلال احمر پاکستان داوخت کنوئی آ گڑا، دیر سفائی ستھرائی، حفظان جان جوڑی، جان جوڑی عامہ، نفسیاتی مدد، خاہوتی تعلق نا بحالی کن خذمت، ہلہلئی و آخبتی پناہ گاہ وزند انا گرج آتا فراوانی ٹی کمک و خذمت فراوان کننگ ءِ، اوڑتون 132ایمبولینس ءُ و دتر نا عطیہ کن 18 لکھ رجسٹرڈ رضاکار ، 7 بلڈ بینک، ہڑدڑی حالیت آتے ٹی 2 لکھ خاہوت نا گرج آتا گڑا و 1775ہڑدڑی حالیت آتون مون تروک آ رضاکار ساڑی ءِ ۔ انجمن ہلال احمر پاکستان بل اینڈ ملینڈا گیٹس فاءونڈیشن نا کمکاری آن پولیو آن بچفنگ نا پڑی کنفسا پاکستان آن پولیو نا چٹفنگ اٹ کمک و بلوچستان اٹی پرائمری ہیلتھ کیئر نا خذمت آتے گچین کننگ کن کاریم کننگ ءِ ۔
