اسلام آباد ۔ 19 اگست (اے پی پی) پاکستان مسلم لیگ (ن) نا صدر و قائد حزب اختلاف شہباز شریف کشمیر نا ویل آ پاکستان نا موقف نا مخ تفی و تائید ءِ کننگ آ چین نا صدر شی جن پنگ و ترک صدر رجب طیب اردوان نا منت واری ءِ ہرفسا پارینے کہ کشمیر آ نما مخ تفی پاکستان تون پرخلوص و دیرینہ سنگتی نا درشانی ءِ ۔ مسلم لیگ نا ترجمان مریم اورنگزیب نا رداٹ شہباز شریف چینی صدر شی جن پنگ و ترک صدر رجب طیب اردوان نا منت واری ءِ ہرفنگ نا چھٹی راہی کرینے ۔ چینی صدر نا پن تینا چھٹی ٹی اوپارے کہ کشمیر نا ویل آ نما مخ تفی آ پاکستان نا الس و تینا جماعت نا کنڈآن منت واری ءِ ہرفیوہ، کشمیر آ نما مخ تفی پاکستان تون نما پرخلوص و دیرینہ سنگتی نا درشانی ءِ، چین ثابت کرے کہ او پاکستان نا پت انا قابل سنگت ءِ، اوپارے کہ چین نا صدر بجاوڑاٹ پاک چین سنگتی ءِ آئرن برادرز نا پن تسنے ۔ اوپارے کہ ای باوری کرفیوہ کہ ای و کنا جماعت سی پیک ڈٹ ءِ مون آ دننگ کن تینا سرتوڑ کوشست آتے برجاتخنہ و کنا پکا یخین ءِ کہ سی پیک مچ آ ڈیہہ ٹی شونہالی نا نوید ءِ و نن سی پیک ءِ بین الریاستی تعلقداری تا سرسہب مثال اسے نا وڑاٹ بدل مرسا خننگ نا آرزومند اُن ۔ ترک صدر نا پن تینا چھٹی ٹی اوپارے کہ کشمیر نا ویل آ نا مخ تفی پاکستان و ترکی نا برادرانہ تعلقداری و خلوص سنگتی نا شاہدی ءِ، نن باوری کرفنہ کہ ہڑتوم آ ملک آتا برادرانہ تعلقداری تے پین سوگو کننگ کن تینا کڑد ءِ ادا کرسا کینہ ۔ شہباز شریف چین و ترکی نا صدر آتا کماشی ٹی ہڑتوم آ ملک آتا شونہالی کن نیک است خواہی تا درشانی ءِ ہم کرے ۔
