اسلام آباد ۔ 19 اگست (اے پی پی) بنجائی وزیر تعلیم و کسبی تربیت شفقت محمود پارینے کہ تعلیم نا آب ءِ گچین کننگ کن بنداوی اصلاحات کننگ انگ ءِ ، مدرسہ غاتا امتحان آتے بنجائی تعلیمی بورڈ انا بست و بند اٹ کننگ آن مدرسہ غاتا طالب علم آتے ہم مون آ تعلیم حاصل کننگ و ملازمت آتا وارخواہی دو بننگ کیک ۔ او دوشنبے نادے آ بنجائی تعلیمی بورڈ اٹی انٹرمیڈیٹ پارٹ انا امتحان آتا نتیجہ غاتا پڑو ءِ کننگ نا دود آن تران کریکہ ۔ اوبنجائی تعلیمی بورڈ انا کارکڑد انا ستاءِ کرسا پارے کہ تعلیمی بورڈ گچین کارکڑد نشان تس ہراڑا او مبارکباد نا حقدار ءِ ۔ اوپارے کہ لمہ و باوہ غاتا کنڈآن بھاز دباءو ئس کہ بنجائی تعلیمی بورڈ انا نتیجہ غاتا پڑو ءِ زوت کرفنگے تانکہ اوفتا چناک پیشن نا ملک یونیورسٹی تیٹی داخلہ ہلنگ کیر ہراڑا او بنجائی تعلیمی بورڈ ءِ پارت کرے ہراڑا تعلیمی بورڈ دے و نن خواری کرسا پک مروک پروگرام آن اسہ ہفتہ اس مست نتیجہ غاتا پڑو ءِ کرے ۔ اوپارے کہ غٹ تعلیمی بورڈ آک یکم اگست اسکان تینا غٹ نتیجہ غاتے بایدے پورو کیر ۔ او بین الوزارتی کانفرنس اٹی دا ویل ءِ چست کیک ۔ اوپارے کہ تعلیم نا آب ءِ گچین کننگ کن اصلاحات کننگ انگ ءِ ۔ جہانی آب انا رداٹ بی اے 16سالہ و ایم اے 18 سالہ کننگک تانکہ ننا ڈگرتی تے جہانی کہول آ امنا کننگ مرے ۔ اوپارے کہ مدرسہ غاتا امتحان آتے بنجائی تعلیمی بورڈ ہلیک و کنے اومیت ءِ کہ بنجائی تعلیمی بورڈ ہم تینا دا زمواری ءِ جوان وڑاٹ پورو کیک ۔ اوپارے کہ مدرسہ غاتا امتحانات بورڈ انا رداٹ مننگ آن مدرسہ غاتا طالب علم آتے ہم مون آ تعلیم دوئی کننگ نا موقع ملنگ کیک و او سرکاری و نجی بشخ آتے ٹی تینا تعلیمی قابلیت نا رداٹ روزگار دوئی کننگ کیرہ ۔ اوداوخت آ پوزیشن ہلوک آ طالب علم ، لمہ و باوہ و استاد آتے مبارکبادی تس ۔
