اسلام آباد ۔ 19 اگست (اے پی پی) چیئرمین سینیٹ محمد صادق سنجرانی 25 آن 28 اگست آ پارلیمانی ڈل اتون اوار متحدہ عرب امارات نا سرکاری دورہ ءِ کیک ۔ چیئرمین سینیٹ ءِ دورہ نا سلہ ءِ متحدہ عرب امارات نا حکومت خلکونے، دورہ ٹی چیئرمین سینیٹ و پارلیمانی ڈل متحدہ عرب امارات نا بڑزکو سیاسی سرکڑدہ و حکومتی سروک آتون اوڑدہی کیرہ، دورہ نا مسخت ہڑتوم آ برادر اسلامی ملک آتا نیام اٹ سیاسی، راجی و اقتصادی تعلقداری تے مون آ دننگ کن پارلیمانی رابطہ غاتے پین سوگو کننگ تون اوار اوار کشمیر اٹی بھارتی بیدادی و جارحیت اٹی علاقائی امن ءِ مون تروک گڑتی تیان متحدہ عرب امارات نا سرکڑدہ غاتے معلومدار کننگ و امن اٹی پاکستان نا کوشست آتے تالان کننگ نا ءِ ۔ داچرجوئی ٹی گپ و تران کرسا چیئرمین سینیٹ محمد صادق سنجرانی پارے کہ پاکستان و متحدہ عرب امارات ڈیہہ و مسلم امہ نا اہم ءُ ملک ءُ ۔ داہڑتوم آ ملک آتے کشمیر نا اہم ویل انا ایسری و علاقائی امن کن بایدے اسیجا کوشست کروئی مرے ۔ اوپارے کہ ہڑتوم آ ملک آتا نیام اٹ معاشی کمکاری نا مون آ دننگ نا بے پناہ کچ ارے ۔ ہڑتوم آ ملک آک ڈیہہ نا شونداری و شونہالی کن اسیجا ایجنڈا غا عمل کرسا پین گچینی اتنگ کیرہ ۔ چیئرمین سینیٹ پارے کہ ہڑتوم آ ملک آتا نیام اٹ تاریخی و دودوربیدگی قدرآک مشترک ءُ ۔ پاکستانی تا بھاز بھلو کچ اس متحدہ عرب امارات نا شونداری و شونہالی ٹی تینا کڑد ءِ ادا کننگ ءُ ۔ متحدہ عرب امارات ءِ پاکستان اٹی امن و ایمنی نا گچین حالیت آتیان فائدہ ہرفسا زرکاری ءِ بایدے مون آ دروئی مرے ۔ چیئرمین سینیٹ پارے کہ گوادر ڈیہہ نا شونداری و زرکاری نا گچین ہند جوڑ مسنے دانا فائدہ غاتیان متحدہ عرب امارات و ایلو علاقائی ملک آک بایدے پبی فائدہ ہرفر ۔ اوڑدہی ٹی ہڑتوم آ ملک آتا نیام اٹ ہڑتوم آ کنڈآتا واپار ءِ مون آ دننگ کن سرکڑدہ غاتا نیام اٹ تین پہ تینی رابطہ و پارلیمانی ڈل آتا ہن و بر اٹی ودکی آ زور شاغنگک ۔
