اسلام آباد ۔ 19 اگست (اے پی پی) لین آف کنٹرول آ بھارتی اشتعال انگیزی نا سوب شاری تا شہیدی آ بھارت نا ڈپٹی ہائی کمشنر ءِ دفتر خارجہ غا بٹنگ انگسا برانز ریکارڈ کرفنگا ۔ ڈائریکٹر جنرل ساءوتھ ایشیاء اینڈ سارک ڈاکٹر محمد فیصل بھارتی ڈپٹی ہائی کمشنر گورواہلوالیہ ءِ دفترخارجہ غا بٹنگسا بھارتی فوج انا کنڈآن لین آف کنٹرول آ جنگ بندی معاہدہ نا خلاف ورزی نا ترند انگا لوز آتے ٹی مذمت ءِ کرے ۔ اوبھارت آ زور شاغا کہ او 2003ء نا فائر بندی نا معاہدہ نا شرف ءِ کے و فائر بندی نا خلاف ورزی نا واقعہ غاتا جاست وپاست ءِ کننگے ۔ اوپارے کہ بھارتی فوج ءِ پارت کننگے کہ او لین آف کنٹرول و ورکنگ باءونڈری آ امن ءِ برقرار تخنگ کن فائر بندی آ اونا اصل روح انارداٹ عمل کے ۔ ڈاکٹر فیصل بھارت آ زور شاغا کہ او اقوام متحدہ نا فوجی مبصر گروپ بھارت وپاکستان ءِ اقوام متحدہ نا سلامتی کونسل نا قرارداد آتا رداٹ تینا کڑدءِ ادا کننگ نا موکل ایتے ۔ ترجمان دفترخارجہ نا رداٹ تدوک آ دے لین آف کنٹرول نا تتہ پانی سیکٹر آ بھارتی فوجی انا بے خار گولہ باری و سم کاری آن 2شاری شہید و اسہ چناس ٹھپی مسوسس ۔ دفترخارجہ نا کنڈآن جاری بیان اٹی پاننگاکہ بھارتی فوج ایل او سی و ورکنگ باءونڈری آ شاری آبادی ءِ نشانہ کننگ ءِ ہر ا انسانی وقار، جہانی انسانی حق و کانود نا خلاف ورزی ءِ ۔ ترجمان پارے کہ بھارت پدریسہ جنگ بندی معاہدہ نا خلاف ورزی ءِ کننگ ءِ، جنگ بندی معاہدہ نا خلاف ورزی آن علاقائی امن ءِ خطرہ ءِ ۔
