اسلام آباد ۔ 19 اگست (اے پی پی) پاکستان تحریک انصاف نا حکومت تینا قیام انا اولیکوسال ملک ءِ مون تروک معاشی، سیاسی و راجی ویل آتا مون ءِ توننگ تون اوار اوار ماحولیاتی رکھ و موسمیاتی بدلی تا چیلنج ءِ امنا کرسا دا بشخ اٹی ہم تاریخ ساز گام گیج چست کرینے ۔ وزیراعظم عمران خان نا وژن نا رداٹ حکومت پاکستان ءِ صاف ستھرا و سرسوز و شاداب ملک اس جوڑ کننگ کن پرعزم ءِ، دا بابت ٹین بین ٹری سونامی پروجیکٹ، صاف و سوز پاکستان پروگرام، پلاسٹک بیگ آتیا پابندی، الیکٹریکل وہیکل پالیسی، شار تیٹی سوزہ و سفائی نا مانیٹرنگ کن کلین گرین انڈیکس نا تیاری و ماحولیاتی رکھ و شونداری نا ڈٹ آتے کن جہانی مالیاتی کمکاری نا دوئی نمان گام گیج ءُ ۔ پاکستان تحریک انصاف موسمیاتی بدلی تیان ودی مروک آ حالیت آتا سنگینی نا بروخت ادراک ءِ کرسا صوبہ خیبر پختونخوا ٹی بلین ٹری سونامی نا سرسہب ماڈل ءِ مچ آ ملک اسکان تالان کننگ نا فیصلہ کرے و دامسخت کن ٹین بلین ٹری سونامی نا عظیم ڈٹ انا بناءِ کرینے ۔ ڈٹ انا رداٹ مچ آ ملک اٹی 10 ارب درخت خلنگ نا اسہ جامع پروگرام اس تیار کننگانے، تحریک انصاف نا صوبائی حکومت خیبر پختونخوا ٹی پنچ سال اٹی اسہ ارب درخت خلکوسس ہراڑان صوبہ ٹی جنگلات آتا رقبہ ٹی 6;46;5درسد ودکی مسنے، دانا جہانی برادری ہم اعتراف ءِ کرینے و دا پروجیکٹ مچ آ دنیا ٹی جنگلات آتا اسہ ماڈل اس جوڑ مسنے ۔ وزارت موسمیاتی بدلی نا کمامدارآتارداٹ وزیراعظم عمران خان نا وژن نا رداٹ ہر چار آ صوبہ بشمول گلگت بلتستان و آزاد کشمیر تون اوار بنجائی دارالحکومت کن 7 پی سی ون تیار کننگانے و شجر کاری نا بابت 7 جتا ماڈل جوڑ کرے ہرافتا منظوری ءِ تننگانے ۔ حکومت اینخو مالی سال اٹی 10 بلین ٹری سونامی ڈٹ اکن 7;46;5 ارب روپئی جتا کرینے وخت اس کہ بروک آ 4سال اٹی دا ڈٹ آ پین 125ارب روپئی خڑچ کننگک، دا ڈٹ آن ملک اٹی گرین اکانومی ءِ مون آ دننگک و روزگار نا لکھ آ پوسکن ءُ وارخواہی ہم ودی مریک، بلین ٹری سونامی خڑچ انا لحاظ اٹ جہانی کہول آ غٹ آن اڑزان ماڈل ثابت مسنے، مچ آ دنیا ٹی پوسکن ءُ درخت خلنگ نا بابت 50 روپئی فی درخت نہاد نا کساس ءِ خلنگ انگ ءِ وخت اس کہ خیبر پختونخوا ٹی تحریک انصاف نا حکومت 14روپئی فی درخت انا خڑچ آن شجرکاری کرینے ۔ اینخو سال بشامی آ سیزن نا شجر کاری مہم نا بناءِ کننگانے و حکومت 18 اگست ءِ پلانٹ فار پاکستان ڈے انا وڑاٹ اڈ تس ۔ ’’ہر بشر اِر اشجر‘‘ نا سرحال آن شجر کاری مہم اٹی شاریک اسہ درخت اس پاکستان و اسہ درخت اس کشمیر کن خلیرہ ۔ دامسخت کن چندی جاگہ غاتیا دونیم آن مسہ کروڑ نیال بشخنگک ۔ ملک اٹی کچٹی نا ودوک آ خلیس آتا رداٹ حکومت تدوک آ اسہ سال اٹی ملک آن پلاسٹک نا بیگ آتا چٹفنگ کن کانود سازی کرے ہرانا رداٹ بنجائی دارالحکومت اٹی 14 اگست 2019ء آن پلاسٹک بیگ آتیا پابندی خلنگانے ۔ دابابت وزیراعظم نا سلاہکار موسمیاتی بدلی ملک امین اسلم نا پاننگ ءِ کہ ملک اٹی سالانہ 60 آن 70 ارب پلاسٹک بیگ جوڑ کننگاکہ ہرا تلف مننگ کپسہ و دا ماحولیاتی کچٹی نا اسہ بھلو ذریعہ اس جوڑ مسنو ۔ اوپارے کہ نن دا بابت آگاہی مہم اس چلیفنگ اُن تانکہ کلین اینڈ گرین پاکستان کن وزیراعظم عمران خان نا وژن ءِ عملی دروشم اس تننگ مرے ۔ خیبر پختونخوا ٹی دا بابت کانود سازی کننگانے وخت اس کہ پنجاب اٹی ہم زوت کانودسازی کننگک، نن پلاسٹک فری پاکستان اس خوانہ تانکہ تینا آبی کوڑی و آبی و جنگلی حیات ءِ رکھ فراوان کننگ کین ۔ ساڑی حکومت وزیراعظم عمران خان نا پارت آ ملک اٹی چاگڑدی کچٹی ٹی کمتی کن بجلی آن چلینگوک آ گاڈی تے درستی راستی کرفنگ کن ہم پالیسی اس تیار کرینن ۔ مچ آ دنیا ٹی گاڈی تیار کروک آ بھلا بھلا ادارہ غاتے پاننگ انگ ءِ کہ بیٹری آن چلینگوک آ گاڈی تیار کیر تانکہ جہانی کہول آ چاگڑدی کچٹی ٹی کمتی کننگ مرے، ساڑی حکومت نا پالیسی گام گیج آتا سوب 2030ء اسکان ملک اٹی چلینگوک آ گاڈی تیان 30 درسد گاڈی بیٹری اٹ چلینگرہ ہراڑان سفری خڑچ و چاگڑدی کچٹی ٹی اسہ تہائی اس کمتی واقع مریک ۔
