اسلام آباد ۔ 17اگست(اے پی پی) دری کارانی وزیر شاہ محمود قریشی ءَ جار جتگ کہ دری کارانی وزارت ءَ یک کشمیر سیل جوڑ کنگ بوہگءَ اِنت ، ما اے فیصلہ کتگ کہ حاسیں بنجاہی حکومتاں پاکستانی سفارت خانہءَ یک فوکل پرسنے جوڑ بہ کن اَنت، مزن وزیرءِ کشمیرءِ ہوالگءَ جوڑ کتگیں حاسیں کمیٹی ءِ دیوانءَ درسیں گل ہوار بوتگ اَنت، یکوئی ءِ کلوہ کہ مظفر آبادءَ دیءگ بوتگ ہما کلوہ اے کمیٹی ءِ دیوانءَ ہم دیءگ بوتگ، گوستگیں روچءَ کشمیرءِ جیڑہءَ را درساں چہ مستریں فورمءَ چست کنگ بوتگ اے ہوالگءَ یازدہ تپاک نامہ اَست، سرج میں کمیٹی ءَ اے گپءِ سرء َ تپاک کتگ کہ مودی سرکاریءَ نہرو ءِ رھبند اناں کنڈ کتگ، مانوں نتیجگءَ سربوتگ اَنت کہ ہندوستانءِ حکمت عملیءَ مودی، امیت شاہ ء ُ دیول اے سیءں سہرائیں کرد اَنت، میاں اوستمانی میڈیاءَ راستء ُ حق ءِ ہمراہ داری کتگ، کمیٹی اے آسرءَ سر اِنت کہ بوت کہ بھارت دنیاءِ دلگوشیءَ را چہ کشمیرءَ دورکنگءِ ھاترءَ یک دروگیں آپریشن بہ کنت، ما فیصلہ کتگ کہ وتی لابنگء ُ کوشستاں انگت گشاد کناں ۔ اے حیالانی در شانی آئیءَ شمبے ءِ روچءَ دری کارانی وزارت ءَ یکجائی پریس کانفرنسءَ گون تران کنانءَ کتگ کہ آئیءِ تہءَ مزن وزیرءِ حاسیں کمک کار ڈاکٹر فردو س عاشق اعوان ، کشمیرکمیٹی ءِ چیئرمین سید فخر امام ء ُ پاک فوج ءِ تعلقداری پڑ ( آئی ایس پی آر) ءِ ڈائریکٹر جنرل میجرجنرل آصف غفور ہوار بوتگ ۔ شاہ محمود قریشیءَ گشتگ کہ مقبوضہ جموں ء ُکشمیر ءَ جمعہءِ روچءَ ہم کرفیو بوتگ بلے ایشیءَ ابید ہم کشمیری پہ جمعہءِ نمازءَ ڈنءَ دراَتکگ اَت، مسیت کُبل کنگ بوتگ اَنت مردماں میدانءَ جمعہءِ نماز ونتگ، اے پہ بھارتءَ تنا یک چنڈگے بوتگ ۔ دری کارانی وزیرءَ گشتگ کہ دری کارانی وزارتءِ نیمگءَ ا ے جارءَ جناں کہ دری کارانی وز ارت ءَ ما یک حاسیں سیل جوڑ کنگ ءَ اَنت ، ، ما اے فیصلہ کتگ کہ حاسیں بنجاہی حکومتاں پاکستانی سفارت خانہءَ یک فوکل پرسنے جوڑ بہ کن اَنت ۔ ڈائریکٹر جنرل آئی ایس پی آر میجر جنرل آصف غفور ءَ گشتگ کہ مقبوضہ کشمیرءَ ہرچ لوگءَ را بھارتءَ بندی جاہ جوڑ کتگ ، مارا اے شک اِنت کہ بھارت دنیاءِ دلگوشی دگہ دیمے ءَ کنگءَ دروگیں آپریشن کت کنت، پاکستانی سلاھ بندیں اُرد ساڑی اَنت ء ُ ہندوستانءَ را ترندیں پسو دیءگ بیت ۔ آئیءَ گشتگ کہ بھارتی مقبوضہ کشمیرءَ 9لکھ بھارتی اُرد ساڑی اَنت، بھارت انسانی حقانی حلاپ ورزیءَ کنگءَ اِنت ء ُ سرج میں دنیاگندگء َ اِنت ۔ آئیءَ گشتگ کہ پاکستان بھارتءِ نیمگءَ چہ لائن آف کنٹرول ءِ حلاپ ورزی ءَ نہ من ایت ۔ ڈی جی آئی ایس پی آر ءَ گشتگ کہ پاکستان ءِ سلاہ بندیں اُرد انی زانت کاریءَ چہ شما سرپد اِت شمے ہمراہ داریءَ گوں پاکستانءِ فوج ترندیں پسو دیءگءِ وسء ُواک ءَ داریت ، سوشل میڈیاءَ را چارگءَ اَنت ایشیءِ فیصلہءَ شما بہ کن اِت ۔
