مزن وزیر عمران خان ءَ ھاسیں مردم آنی واستہ ’’ جان سلامتی آسراتی‘‘ پروگرام ءِ بنگیج کت
چاگرد ءِ ھمزوریں تبک ءِ مردم آنی گہبود ءُُ ھک آنی پاسبانی ریاست ءِ زمہ واری بیت، ریاست مدینہ ءِ وژن ءِ رد ءَ جان سلامتی آسراتی ءُُ ’’احساس‘‘ پروگرام بنگیج کنگ بوتگ، پاکستان ءَ را ھما رنگیں اسلامی گہبودی ریاست ءِ جوڑ کنگ لوٹ آں ھمودا رحم ، بنی آدم دوستی ءُُ انصاف بہ بیت، مزن وزیر عمران خان ءِ مراگش ءَ گوں گشتانک
اسلام آباد ۔ 17 اگست (اے پی پی) مزن وزیر عمران خان ءَ ھاسیں مردم آنی واستہ ’’ جان سلامتی‘‘ پراگرام ءِ بنگیج کنان ءَ گوشت کہ چاگرد ءِ ھمزوریں تبک ءِ مردم آنی گہبود ءُُ ھک آنی پاسبانی ریاست ءِ زمہ واری انت، ریاست مدینہ ءِ وژن ءِ رد ءَ جان سلامتی آسراتی ءُُ ’’احساس‘‘ پروگرام ءِ بنگیج کتگ، پاکستان ءَ را ھما رنگیں اسلامی گہبودی ریاست جوڑ کنگ لوٹ آں ھمودا رحم، بنی آدم دوستی ءُُ انصاف بہ بیت ۔ شمبے ءِ روچ ءَ مزن وزیر کارگس ءَ جان سلامتی آسراتی پروگرام ءِ بنگیج ءِ واستہ برجم داشتگیں مراگش ءَ بنجاھی کابینہ ءِ باسک، ٹوھیں کارندہ ءُُ جتا جتائیں زندمانی شوبگ آں گوں سیادی داروکیں مردم آں بھر زوری کت ۔ مراگش ءِ بنگیج گوں قرآن پاک ءِ تلاوت ءَ کنگ بوت ۔ اے موہ ءِ سر ءَ جان سلامتی انصاف کارڈ ءِ وسیلگ ءَ ھمزوریں تبک ءِ مردم آناں آسرارتی پجاری ءِ ھوالگ ءَ ڈاکیومنٹری تامُر ءِ ھم پیش دارگ بوت ۔ مزن وزیر عمران خان ءَ ھاسیں مردم آنی تہءَ جان سلامتی آسراتی کارڈ بھر ءُُ بانگ کت ۔ ایشی ءَ پد مزن وزیر عمران خان ءَ مراگش ءَ گوں گشتانک دیان ءَ گوشت کہ مردم آنی وڑ ءَ راج آنی وژن بیت انت، پاکستان ھم یک وژن ءِ چیر دستی ءَ جوڑ بوتگ، ما ایشی ءَ چہ گستا شتگ آں ۔ آئی ءَ گوشت کہ پاکستان ءَ مدینہ ءِ ریاست ءِ وڑ ءَ اسلامی گہبودی ریاست ءِ جوڑ بوھگی ات، ریاست مدینہ نوکیں وژن ءِ بنیات ءِ سر ءَ جوڑ بوتگ، ریاست مدینہ بنی آدم دوست ءُُ انصاف ءِ رھبند آنی سر ءَ جوڑ بوتگ ۔ آئی ءَ گوشت کہ چاگرد ءِ ھمزوریں تبک ءِ مردم آنی کمک ءُُ ایشانی واستہ موہ ءِ پیداک کنگ ریاست ءِ زمہ واری انت ۔ آئی ءَ گوشت کہ بنی آدم دوستیں چاگرد ءِ تہ ءَ رحمدلی ءَ را سک باز شرپ است انت، مئے زمہ واری انت کہ پشت کپتگیں مردم آنی کمکار بہ بنت، اے رد ءَ احساس پروگرام سک باز سسا ساچ ءَ پد سرج میں تیاری ءِ گوما بندات کنگ بوتگ ۔ پاکستان ءَ را ھما رنگیں ریاست ءِ جوڑ کنگ لوٹ آں ھمودا رحم، بنی آدم دوست ءُُ انصاف بہ بیت ۔ ایشی ءَ چہ پیسر مزن وزیر ءِ ھاسیں کمکار برائے راجی جان سلامتی ڈاکٹر ظفر مرزا ءَ مراگش ءَ گوں گشتانک ءِ ساھت ءَ گوشت کہ پاکستان تحریک انصاف ءِ حکومت ءَ یک سالے ءِ سرجمی ءِ پد ءَ ھاسیں مردم آنی واستہ جان سلامتی آسراتی پراگرام ءِ بنگیج ءِ پد ءَ اللہ پاک ءِ شگر ءُُ منت گپت، اے گامگیج ھاسیں مردم ءِ واستہ سک باز ارزشتی انت ۔ آئی ءَ گوشت کہ مزن وزیر عمران خان ءَ لس مردم آنی آسراتی ءِ واستہ ھاسیں دلگوشی دیگ ءَ انت، اے گامگیج ھمے دلگوشی آنی کڈئی انت ۔ آئی ءَ گوشت کہ نادرا ءِ کرّا دو لکھ رجسٹرڈ آں ابید رجسٹرڈ نہ بوتگیں ھاسیں مردم ھم جان سلامتی آسراتی پروگرام ءَ چہ سیت مند بوت کن اَنت ۔ مزن وزیر عمران خان ءَ معاشی مشکل آں ابید احساس پروگرام ءِ واستہ 200 ارب کلدار گیش اینتگ ۔ آئی ءَ گوشت کہ 48ضلع آنی تہ ءَ گریبی ءِ گڈی کرانٹُک ءَ چہ جھل نندوکیں توا میں ھاندان جان سلامتی آسراتی کارڈ ءِ وسیلگ ءَ دوا ءُُ درمان کت کن اَنت ۔ تھر پارکر ءِ توا میں ھاندان آں جان سلامتی کارڈ ءِ آسراتی دیگ بیت ۔ آئی ءَ گوشت کہ ما جان سلامتی ازمت آناں ھمک شہری مردم آنی بنیاتی ھک لیک آں ۔ ڈاکٹر ثانیہ نشتر ءَ گوشت کہ ابنارملیں مردم آنی واستہ سرکاری ملازمت ءِ تہ ءَ دو درسد کوٹہ ءِ سر ءَ ترندی ءَ گوں گامگیج کنگ بوھگ ءَ انت ۔ آئی ءَ گوشت کہ ھاسیں مردم آنی سرکاری گس آنی تہ ءَ یک درسد ءِ کوٹہ گیش اینگ بوتگ ۔ مزن وزیر ءَ احساس پروگرام ءِ پنچ ٹک آنی منظوری داتگ ۔ پروگرام ءِ چیر دستی ءَ آیوکیں چار سال آنی تہ ءَ یک کروڑ مردم آناں گہبودی رکھینگ پجارینگ بیت، 38لکھ مردم آناں روزگار ءِ موہ پجارینگ بیت، یک کروڑ ھاندان آناں جان سلامتی آسراتی کارڈ پجارینگ بیت، احساس پروگرام ءِ چیر دستی ءَ پنج لکھ نودربر آناں وظیفہ دیگ بیت، شست 60لکھ زالبول آنی واستہ پودگ ءِ پروگرام بندات کنگ بوھگ ءَ انت ۔
