اسلام آباد۔ 25جون (اے پی پی) قومی احتساب بیورو مسکوہی ڈائریکٹر جنرل پی آئی ڈی چوہدری رشید احمد، اکاﺅنٹ آفیسر بادشاہ رحمن ، محمد رفیق خٹک ڈی ڈی او، محمد ایاز یو ڈی سی و میسرز سم پرائیویٹ لمیٹڈ تون اوار ایلوفتا برخلاف بدعنوانی نا ریفرنس اس دا کرینے۔ مسکوہی ڈائریکٹر جنرل پی آئی ڈی چوہدری رشید احمد 11 اگست 2009 ءآن 29 ستمبر 2011 ءاسکان پی آئی او نا عہدہ غا کاریم کرے۔ داوخت اٹی او چیئرمین پی اے آر سی این او سی نا پک کننگ ئِ المی کننگ و میسرز سم پرائیویٹ لمیٹڈ نا بل اے جی پی آر آ مون تننگ آن مست اونا پک کرفنگ اٹ بے سہب مس۔ او اختیار آتے ناروا کاریم اٹ اتسا ہندا کمپنی نا 28.5 ملین روپئی نا جعلی بل آتا منظوری ئِ تس۔ جاست وپاست اٹی معلوم مسنے کہ دوبہ دار اسہ ایلو نا اواری اٹ قومی خزانہ ئِ نسخان تسر وخت اس کہ دوبہ دار بدعنوانی ٹی ہم اوار ئسر۔ اسہ پین بدعنوانی نا ریفرنس اسے ٹی نیب راولپنڈی دزگیر مروک اِرا دوبہ دار آن 3.558 ملین روپئی نا رقم ہلکونے۔ دوبہ دار آک دوبہ ئِ امنا کرسا پلی پارگین نا کمک اٹ سلوک آ پیسہ غاتے پدی تننگ نا خواست کریر ہراکہ 3.558 ملین روپئی جوڑ مریرہ۔ نیب راولپنڈی نا ذیلی دفتر گلگت بلتستان دا پیسہ غاتے نیشنل بینک آف پاکستان اٹی جمع کرفینے۔ دا پیسہ غاتے نیب انا ذیلی دفترگلگت بلتستان نا ڈائریکٹر جنرل ناصر جونیجو نیشنل بینک انا وائس پریذیڈنٹ/بزنس منیجر ناظم خان نا حوالہ کرے۔ داوخت آ نیب انا آفیسر آک ہم ساڑی ئسر۔ نیب راولپنڈی نا ذیلی دفتر گلگت بلتستان ، چیئرمین نیب جسٹس (ر) جاوید اقبال و ڈائریکٹر جنرل نیب راولپنڈی عرفان نعیم منگی ناپارت آتیا عمل کرسا زیرو ٹالرنس نا پالیسی نا رداٹ بدعنوانی نا چٹفنگ کن پرعزم ئِ۔
