اسلام آباد۔ 11 مارچ (اے پی پی) اسپیکر قومی اسمبلی اسد قیصر نا کماشی ٹی دوشنبے نادے آ داڑے راجی ادارہ، ڈونر ایجنسی تا سرکڑدہ غاک و مخیر خواجہ غاتا دیوان اس مس۔ دیوان اٹی پیٹرن ان چیف سویٹ ہومز زمردخان تون اوار 50 آن زیات راجی ادارہ غاتا نمائندہ غاک بشخ ہلکر۔ داوخت آ اسد قیصر پارے کہ انسانیت نا خذمت آن اللہ تعالیٰ نا رضا دوئی مریک، انسانیت و محروم تپہ غاتا راجی آسراتی کن کاریم کروک آ بندغ آک و ادارہ غاک ستاکڑزرہ۔ اسپیکر قومی اسمبلی پارے کہ رفاعی ادارہ غاتے ٹی بے لوث کاریم کروک آ بندغ آک تینا دنیاو آخرت ءِ جوڑ کننگ ءُ۔ چوری ، جنوزان و بے سیبو تے زند ءِ تدیفنگ نا وارخواہی تننگ ننا غٹ انا اسیجا زمواری ءِ۔ خصوصی بندغ و چناتے اہم ءُ ہند اس تننگ کن غٹ وسیلہ غاتے کاریم اٹ اتوئی مریک۔ اسپیکر قومی اسمبلی پارے کہ رفاعی ادارہ غاتے کاریم کرسا خناٹ کنے ٹی دا جوزہ بیدار مس کہ محروم تپہ غاتے کن کاریم کیو۔ کنا است خواہی ءِ کہ ہر صوبہ ٹی ماڈل ویلفیئر ویلج اس جوڑ کننگے۔ اسپیکر اسد قیصر پارے کہ خیر انا کاریم کن ننے اسیجا وڑاٹ جہد کننگ نا گرج ءِ۔ راجی ادارہ غاتون کاریم کرسا کنے سکون ملک۔ ماڈل ویلفیئر ویلیج اٹی بے سیبو خلقت ءِ ہنکین، تعلیم، درمان تون اوار غٹ بنداوی آسراتی تے تننگک۔ بشخ ہلوک آک اسپیکر نا جوزہ نا ستاءِ کریر و دارداٹ تینا تینا سلاہ غاتے ہم پیش کریر۔
