اسلام آباد۔ 11 مارچ(اے پی پی) بنجائی وزیر تعلیم، پروفیشنل ٹریننگ، قومی تاریخ و ادبی میرات شفقت محمود پارینے کہ وزیراعظم عمران خان نا پارت نا رداٹ عظیم تاریخی میرات آتے رکھ کننگ کن عملی گام گیج کننگ انگ ءِ، ملک اسے نا درستی راستی ٹی اونا دودوربیدگی میرات آتا کڑد بے کچ اہمیت تخک۔ ایڈوائزری کمیٹی آف ہیریٹیج نا اولیکو دیوان نا کماشی ءِ کرسا بنجائی وزیر پارے کہ دودوربیدگی میرات آتے رکھ کننگ و اوفتا بحالی آن نئے بیرہ ملک انا مثبت دروشم تالان مریک بلکن داڑان کلچر ٹورازم ءِ ہم مون آ دننگ دوئی مریک۔ اوپارے کہ حکومت عظیم دودوربیدگی میرات آتے رکھ کننگ کن عملی گام گیج کننگ ءِ۔ دا چرجوئی ٹی وزیراعظم نا پارت آ ایڈوائزری کمیٹی آف ہیریٹیج اس ٹہیفنگانے۔ ہرادے دا مینڈیٹ ءِ تننگانے کہ او ملک اٹی ہمو جاگہ غاتا پیدواری ءِ کے و رکھ و بحالی و گچینی کن سلاہ ایتے۔ بنجائی وزیر پارے کہ دا چرجوئی ٹی صوبائی کہول آ ہم کمیٹی ٹہیفنگک اوکان پد اونا دنگ ءِ ضلعی کہول آ ودفنگک و تاریخ و تاریخی ماڑی تیٹی است خواہی تخوک آ رضاکار آتے ہم دا کمیٹی تیٹی اوار کننگک۔ نیشنل میوزیم کراچی نا بابت سپریم کورٹ نا فیصلہ غا عمل کننگک۔ دیوان اٹی سیکرٹری قومی تاریخ و ادبی میرات انجینئر عامر رضا، جوائنٹ سیکرٹری و ڈی جی ڈیپارٹمنٹ آف آرکیالوجی اینڈ میوزیم سید جنید اخلاق و ایلوفک ہم ساڑی ئسر۔ دیوان اٹی جوائنٹ سیکرٹری ، ڈی جی ڈیپارٹمنٹ آف آرکیالوجی اینڈ میوزیم سید جنید اخلاق ساڑی مروک آتے سرجم حوال تسر۔ دیوان اٹی پاننگاکہ پاکستان اٹی 10 ہزار آن زیات تاریخی و مذہبی ماڑی ساڑی ارے ہرافتا ریکارڈ ءِ جوڑ کننگ انگ ءِ و قومی تاریخ و ادبی میرات ڈویژن یونیسکو تون اواری اٹ تاریخی میرات آتا ریکارڈ اس جوڑ کننگ ءِ۔ دیوان اٹی کمیٹی نا باسک آک قومی و تاریخی میرات نا بحالی کن جتا ءُ سلاہ تسر ۔ یات سلے کہ قومی تاریخ و ادبی میرات ڈویژن پاکستان اٹی ساڑی عظیم دودوربیدگی میرات آتا بحالی و رکھ اکن اولیتی بنداو تیا گام گیج کننگ ءِ ولے دا چرجوئی ٹی پین گام گیج کننگ نا سخت گرج ءِ انتئے کہ پاکستان عظیم دودوربیدگی میرات آتا امین ءُ ملک اسے، داڑے مستین نا تہذیب آتا نشانیک ساڑی اریر۔
