اقوام متحدہ۔ 11 مارچ (اے پی پی) اقوام متحدہ نا ہیڈ کوارٹر اٹی بروک آ ہفتہ اقوام متحدہ نا ذیلی ادارہ ’’کمیشن آن دی سٹیٹس آف وومن ‘‘(سی ایس ڈبلیو) نا دیوان اٹی پاکستان اٹی زالبولءِ زیات آن زیات واکدار کننگ و صنفی بریبری نا بابت کروک آ گام گیج آتیان مچ آ دنیا نا ملک آتے معلومدار کننگ اٹ کمک رسینگک داوخت آ پاکستان 4 جتا ءُ دود اڈ ایتک ہرافتا مسخت صنفی بریبری نا مون آ دننگ و زالبول ءِ زیات آن زیات واکدار کننگ نا عزم انا اعادہ ءِ۔ اقوام متحدہ ٹی پاکستان نا آخبتی مندوب ملیحہ لودھی جہانی ادارہ نا دیوان آن مست ’’اے پی پی‘‘ تون خصوصی گپ و تران کرسا پارے کہ نن سی ایس ڈبلیو 63می دیوان اٹی تینا سفارتی سرجزآتے برجاتخنہ۔ اوپار ے کہ اقوام متحدہ نا جنر ل اسمبلی نا کلینڈر نا رداٹ سی ایس ڈبلیو نا دیوان ارٹ میکو بھلا ایونٹ ءِ ہراٹی مدام صنفی بریبری نا مون آ دننگ و زالبول ءِ زیات آن زیات واکدار کننگ نا بابت مچ آ دنیا نا ملک آتا مندوب آک خیال آتا درشانی ءِ کیرہ۔ اوپارے کہ کانفرنس اٹی جہانی کہول آ 9 ہزار ڈل آک شریک مریرہ، ہرا اسہ ریکارڈ اسے ہراٹی باسک ملک آتا نمائندہ ، اقوام متحدہ نا ذیلی ادارہ و مچ آ دنیا غان ای سی او ایس او سی تون اوار غیر سرکاری ادارہ غاتا نمائندہ غاک بشخ ہلنگ ءُ۔ اوپارے کہ اینخو نا سال انا سرحال ’’راجی رکھ انا نظام‘‘ آسراتی تسکان رسینگ، صنعتی بریبری نا مون آ دننگ کن پائیدار بنداوی پنجر نا فراوانی و زالبول (نیاڑی ، مسن) تے زیات آن زیات واکدار کننگ‘‘ گچین کننگانے۔ اوپارے کہ پاکستان نا نمائندگی ءِ نیشنل کمیشن فار ویمن نا چیئرپرسن خاور ممتاز کیک۔ پاکستانی سفیر پارے کہ پاکستان ، ترکی ، قطر ، ایران، انڈونیشیا ، کینیڈا و ایلو ملک آتا اواری اٹ دیوان نا وخت آ چار دود اڈترفنگ نا مسخت معلومداری اسکان رسینگ، اسہ ایلو نا آزموندہ غاتیان فائدہ ہرفنگ و اواری اٹ کاریم کننگ کن اسہ پلیٹ فارم اس مہیا کننگ نا ءِ۔ 4 جتا پروگرام تا میزبانی آن بیدس پاکستان پنچ می دود اٹی ہم بشخ ہلیک۔ ملیحہ لودھی پارے کہ سی ایس ڈبلیو آن پاکستان ءِ ملک اٹی کروک آ وسیع اصلاحات، زالبول ءِ واکدار کننگ نا ایجنڈا و تینا آزموندہ غاتیان ایلو ملک آتا فائدہ ہرفنگ کن اسہ پلیٹ فارم اس دوئی مریک ہراڑان پاکستان اٹی زالبول ءِ زیات آن زیات واکدار کننگ و صنفی بریبری نا بابت کروک آ گام گیج آتیان مچ آ دنیا نا ملک آتے معلومدار کننگ اٹ کمک رسینگک۔
