اسلام آباد۔ 11مارچ (اے پی پی) بنجائی وزیر انسانی حق ڈاکٹر شیریں ایم مزاری تون پاکستان اٹی جہانی کمیٹی ریڈکراس نا سروک ریٹو اسٹاکر ڈل اتون اوار دوشنبے نادے آ داڑے اسلام آباد اٹی اوڑدہی کرے۔ اوڑدہی ٹی انسانی حق انا رکھ اتون اوار پیشن نا ملک آتے ٹی بند پاکستانی شاری تے مون تروک ویل و اوفتا حق انا رکھ انا بابت چندی معاملہ غاتیا گپ و تران کننگا۔ داوخت آ ڈاکٹر شیریں مزاری بھارت اٹی بند بے قصور پاکستانی بندی شاکراللہ آ بیدادی و اونا خون آ گڑتی نا درشانی ءِ کرسا ریڈکراس ڈل انا سروک نا چکار ءِ داکنڈا کرفے و پارے کہ بھارت اٹی ریاستی سرپرستی ٹی پاکستانی بندی ءِ بیدادی آن پد اونا خون ءِ کننگا ہراکہ مذمت نا قابل ءِ۔ اوجہانی کمیٹی ریڈکراس نا ڈل انا سروک ریٹو اسٹاکر آ زور شاغا کہ پیشن نا ملک آتے ٹی بند پاکستانی تے مون تروک ویل آتے ایسر کننگ کن گام گیج کننگے۔ بنجائی وزیر پارے کہ نن تینا شاری تے بنداوی انسانی حق آتا فراوانی ءِ المی جوڑ کننگ کن سنبرینگوک اُن و انسانی حق انا رکھ اکن گچین گام گیج کننگ اُن۔ او ڈل ءِ دا بابت کروک آ گام گیج آتیان معلومدار کرے۔ ڈاکٹر شیریں مزاری پارے کہ نن ساڑی آ کانود آتیا عملدرآمد و پوسکن آ کانود سازی آ چکار کرینے۔ اوپارے کہ نن دا بابت چندی پوسکن آ بل آتیا کاریم کننگ اُن ہراٹی بیدادی نا توننگ و دوران حراست مرک و معذور بندغ آتا حق انا بل ہم اوار ءِ ہرادے زوت پارلیمنٹ اٹ پیش کننگک۔ او ڈل ءِ مستی پارے کہ انسانی حق و ویل آتا بابت ڈیٹا بیس اس ہم تیار کننگ انگ ءِ۔ پاکستان اٹی جہانی کمیٹی ریڈ کراس نا ڈل انا سروک انسانی حق انا رکھ اکن پاکستان خاص کر وزارت انسانی حق انا کوشست آتا ستاءِ کرے و دارداٹ تینا کنڈآن ہر وڑ کمکاری نا باوری ترفے۔
