اسلام آباد/راولپنڈی۔ 09 مارچ (اے پی پی) بنجاہی وزیر پٹرولیم غلام سرور خان ءَ گوشت کہ مہلوک ءَ را زندءِ بنیاتی آسراتی پھجارگ تحریک انصاف ءِ حکومت ءِ بنیاتی مکسد انت،بدلی ءِ اے سفر ءِ تہ دراھیں ادارگ نوکیں سوچ ءَ گوں حکومت ءِ کمک ءَ کن انت تنکہ برجاھیں فلاحی منصوبگانی زوت سرجمی ءَ ر سدکی جوڈ کنگ بیت۔آہاں اے ھیالانی درشان ڈپٹی کمشنر آفس راولپنڈی ءِ تہ جاڑی سالینہ دیمروئی منصوبگ 19۔2018 ءِ ھوالہ چہ لوٹ کتگیں دیوان ءِ سروکی کنان ءَ کتگ انت۔آہاں گوشت کہ ہمگرنچیں محکمہ دیمروئی منصوبگانی رپتار ءَ را گیش کنان ءَ ایشی ءِ سرجمی ءَ را سدکی کن انت۔ غلام سرور خان ءَ گوشت کہ گوجر خان ءِ تہ پوٹھوار یونیورسٹی ءُُ ٹیکسلا ءِ تہ گنداھارا یونیورسٹی ءِ ھوار سرجمیں ضلع ءَ ٹیکنیکل ءُُ وکیشنل ایجوکیشن ءِ ادارگہانی زور ہڈ دیگ بنت۔اے موہ ءِ سرا بنجاہی وزیر پیٹرولیم غلام سرور خان ءَ را ہمگرنچیں ادارگہانی نیمگا چہ ورگ ءِ ساپیں آپ ءِ پھجارگ دگانی ءُُ پلانی ھوار کسانیں ڈیمانی جوڈ جاڑی ءِ ھوالہ چہ جاڑی کارانی سرا بریفنگ دیگ بوتگ۔آہاں گوشت کہ خطہ پوٹھوہارءِ تہ درستاں چہ گیش منی ڈیم جوڈ کنگ ءِ ضلورت انت ایشی چہ اسلام آباد ءُُ راولپنڈی ءِ تہ آپ ءِ لیول برز بیت۔آہاں اے ھوالہ چہ ابید دیر ءِ فزیبلٹی رپورٹ جوڈ کنگ ءِ سرا زور مان کنان ءَ گوشت کہ چہان ڈیم، جاوا ڈیم، پاپین ڈیم، مصریوٹ ڈیم، انگوری ڈیم، مانگا سواں ڈیم، دھار۔جاوا ڈیم، چراہ ڈیم، دلہوڑ ڈیم ءِ ھوارکوٹلی ستیاں ڈیمءِ وڈیں ھاسیں منصوبگانی سرا کار ءَ را ترند کنگ بیت ءُُ اے ھوالہ چہ رپورٹ زوت ہمگرنچیں اسمبلی باسکاں را دیئگ بیت۔اے موہ ءِ سرا دیوان ءِ تہ ایم این ایز منصور حیات خان صداقت علی عباسی ءُُ شیخ راشد شفیقءِ ھوار صوبائی اسمبلی ءِ باسک عمار صدیق خان ءُُ باسک صوبائی اسمبلی چوہدری ساجد ءِ ھوار دگہ محکمہ ءِ واکدارھم ساڑی اتنت۔
