چھاچھرو۔ 08 مارچ (اے پی پی) وزیراعظم عمران خان پارینے کہ پاکستان نا سلہہ بند فوج و پاکستان نا الس پورو وڑاٹ یکجا و تیار ءُ، لمہ وطن نا سالمیت، رکھ و آجوئی نا خاطر ای و کنا قوم آخریکودم اسکان جنگ کینہ، اگہ کس اس سمجھک کہ پاکستان آ جلہو کرسا داڑے دتر وہیفک تو پاکستان اونا پبی ورندی ءِ ایتک، انسان تا بشخ وپانٹ و خار تا سیاست آ باور کپنہ ، پاکستان پرامن ءُ ملک اسے، پاکستان اٹی رہینگوک آ اقلیت آک بریبر نا شاری ءُ، نیشنل ایکشن پلان آ پورو وڑاٹ عملدرآمد مریک ، بلاول نا باوہ وڈی خوری و منی لانڈرنگ آن یوٹرن ہلککہ تو اینو مشکل اٹ متوکہ و نیب و عدالت آتا چکر ءِ خلتوکہ، بلاول نا باوہ بلاول ءِ ہم مشکل اٹی بٹینے، بنجائی حکومت آن صوبہ نا گچینی کن اخس کہ مس کینہ۔ داخیال آتا درشانی ءِ او جمعہ نادے آ تھر پار کر نا علاقہ چھاچھرو ٹی جان جوڑی کارڈ بشخ وپانٹ کننگ نا وخت آ اسہ بھلو السی مچی سے آن تران کرسا کرے۔ داوخت آ وزیر خارجہ شاہ محمود قریشی، گورنر سندھ عمران اسماعیل و ارباب غلام رحیم ئسک ہم ساڑی ئسر۔ وزیراعظم عمران خان پارے کہ گچین کاری تیان پد او اولیکو وار جلسہ سے آن تران کننگ ءِ، اینو تھر پارکر آ ہنداخاطران بسونن انتئے کہ دا پاکستان نا غٹ آن پسماندہ علاقہ ءِ ، داڑے 70 درسد خلقت نیزگاری نا لکیر آن شیف زند ءِ تدیفنگ ءُ ، جوان ءُ خور ملپننگ نا سوب آن تدوک آ مسہ چار سال اٹی داڑے 1300 چنا زوال کرینو۔ وزیراعظم پارے کہ اقتدار اٹی بننگ نا اونا غٹ آن بھلا مسخت خلقت ءِ نیزگاری آن کشنگ کن گام گیج و کوشست کروئی ءِ، تھر پار کر اٹی نیزگاری نا کچ غٹ آن زیات ءِ ہنداخاطران ای دانگیا بننگ نا فیصلہ کریٹ۔
