ڈیہہ نا ساڑی حالیت، ہڑتوم آ کنڈآتا تعلقداری و تین پہ تینی است خواہی نا معاملہ غاتیا گپ و تران
اسلام آباد۔ 08مارچ (اے پی پی) اسپیکر قومی اسمبلی اسد قیصر تون پاکستان اٹی کینیڈا نا ہائی کمشنر کرسٹائین وینڈی گیلمور جمعہ نادے آ داڑے اوڑدہی کرے۔ اوڑدہی ٹی ڈیہہ نا ساڑی حالیت، ہڑتوم آ کنڈآتا تعلقداری و تین پہ تینی است خواہی نا ایلو معاملہ غاتیا گپ و تران کننگا۔ اسپیکر پارے کہ پاکستان کینیڈا تون سوگو و محکم تعلقداری و تین پہ تینی رابطہ غاتے مون آ دننگ نا خواہندار ءِ۔ پاکستان علاقائی شونداری و ڈیہہ نا شونہالی کن ڈیہہ نا غٹ ملک آتون تعلقداری تے پین سوگو کننگ خواہک۔ اسپیکر پارے کہ پارلیمانی سفارتکاری ہڑتوم آ ملک آتے خڑک اتنگ اٹی اہم ءُ کڑد اس ادا کننگ کیک، ہڑتوم آ ملک آتا پارلیمنٹ نا باسک آتا نیام اٹ رابطہ غاتے ٹی ودکی آن اوفتے اسہ ایلو نا آزموندہ غاتیا فائدہ ہرفنگ نا وارخواہی دوئی مریک۔ اوپارے کہ پاکستان کینیڈا تون زرکاری تون اوار غٹ بشخ آتے ٹی کمکاری خواہک، پاکستان اسہ امن پسند ءُ ملک اسے و ساڑ ی آ پاک بھارت بے چیٹی تیٹی پاکستانی سیاسی سرکڑدہ غاک ہر گام آ سگ انا درشانی ءِ کریر۔ اوپارے کہ کینڈا ٹی رہینگوک پاکستانی پردیسی تے ہروڑنا آسراتی تننگے۔ کینیڈین ہائی کمشنر پارے کہ پاکستان ڈیہہ نا اسہ اہم ءُ ملک اسے، و کینیڈا پاکستان تون تینا دوستانہ تعلقداری تے بھاز اہمیت ایتک۔ کینیڈا پاکستان تون تعلیم، جان جوڑی تون اوار راجی و معاشی کمکاری ءِ مون آ دننگ نا است خواہ ءِ۔ اوپارے کہ کینیڈا ٹی رہینگوک پاکستانی کمیونٹی کینیڈا نا شونداری ٹی اہم ءُ کڑد اس ادا کننگ ءِ و اوفتے ہر وڑنا آسراتی تننگک۔ اوپارے کہ ہڑتوم آ ملک آتا پارلیمنٹ نا باسک آک ہڑتوم آ قوم تے خڑک اتنگ اٹ اہم ءُ کڑد اس ادا کننگ کیرہ۔
