اسلام آباد۔ 08 مارچ (اے پی پی) وزیر توانائی عمر ایوب خان پارینے کہ حکومت بجلی نا ڈٹ آتیا کاریم کننگ ءِ ، سعودی عرب چار ارب ڈالر نا زرکاری کیک، نیو کلیئر توانائی آ ہم زرکاری کننگک، ننا سیفٹی آب آتے دنیا امنا کرے، ڈسٹری بیوشن نا نظام ءِ گچین کننگ اُن۔ جمعہ نادے آ ایوان بالا ٹی وقفہ سوج آتے ٹی سینیٹر ڈاکٹر جہانزیب جمالدینی نا سوج انا ورندی ٹی وزیر توانائی عمر ایوب پارے کہ دا ڈٹ آتے کن دیر انا گرج مریک، حکومت بجلی نا ڈٹ آتیا کاریم کننگ ءِ، سعودی عرب چار ارب ڈالر نا انرجی و پاور نا بشخ اٹی زرکاری کیک، نیو کلیئر انرجی ننا انرجی مکس نا اسہ اہم ءُ جزو اسے ، نن داٹی زرکاری کینہ، داوخت آ 1800 میگاواٹ نیو کلیئر آن بننگ ءِ۔ اوپارے کہ 1960 ء آن نیو کلیئر توانائی نا بشخ انا بناصدر ایوب نا دور اٹی مسوسس، ننا سیفٹی نا آب آتے دنیا امنا کرینے، سینیٹر عثمان کاکڑ نا سوج انا ورندی ٹی وزیر توانائی عمر ایوب پارے کہ پیپکو ٹی ترقی تا معاملہ ہائیکورٹ اٹی زیر سماعت ءِ۔ سینیٹر کلثوم پروین نا سوج انا ورندی ٹی وزیر توانائی عمر ایوب پارے کہ ڈسٹری بیوشن کمپنی تیٹی ہنسا ای چھاپہ خلسا سیفٹی آب آتے چیک کرینٹ، دا چرجوئی ٹی ہچ ءُ رعایت اس کننگپک۔ سینیٹر سراج الحق نا اسہ سوج اسے نا ورندی ٹی اوپارے کہ کے پی کے ٹی اسہ ہی ڈسٹری بیوشن کمپنی اسے ہرانا بشخ کننگ والا اُن ، مستین اٹی کوئٹہ و پشاور اٹی متکن آ لین تیا چکار کننگتو، متکن آ ٹاسفارم و ڈسٹری بیوشن سسٹم ءِ بدل کننگ اُن، تار تے بدل کننگ کن دونیم ارب روپئی خڑچ کننگ اُن، کے پی کے ٹی ہم دا بشخ اٹی بھلو زرکاری اسے کن جہانی مالیاتی ادارہ غاتون گپ و تران کننگ اُن۔
