اسلام آباد۔ 08مارچ (اے پی پی) وزیراعظم عمران خان مادر ملت فاطمہ جناح ءِ خراج عقیدت پیش کرسا زالبول ءِ قومی جوڑ جاڑ و شونداری ٹی تینا روا کڑد ءِ ادا کننگ کن اوفتے رکھ و ساز گار چاگڑد نا فراوانی ءِ المی کننگ نا پکا عزم انا اعادہ ءِ کرینے۔ او داہیت ءِ جمعہ نادے آ جہانی زالبول دے انا وخت آ تینا اسہ ٹویٹ اسے ٹی پارے۔ جہانی زالبول دے ءِ جمعہ نادے آ پاکستان تون اوار مچ آ دنیا ٹی جوش و جوزہ اٹ اڈ تننگ انگ ءِ۔ وزیراعظم تینا ٹویٹ اتون اوار بانی پاکستان قائد اعظم محمد علی جناح ؒ و اونا ایڑھ مادرملت فاطمہ جناح نا اسہ عکس اس و بانی پاکستان نا اسہ فرمان اس ہم شیئر کرے۔ قائد نا فرمان اٹی پاننگاکہ ’’ہچ ءُ جہد اس نرینہ غاتا شانہ بشانہ زالبول نا بشخ ہلنگ آن بیدس سرسہب مننگ کتنے، دنیا ٹی اِرا واک ءُ اسہ زغم و ایلو قلم نا ۔ ہڑتوم آتا نیام اٹ بھاز زیات مسابقت و ہمسری ءِ، ولدا اسہ مسٹ میکو واک ءِ ہرا ہڑتوم آ تیان زیات آں زیات واکدار ءِ و او زالبول آتا واک ءِ‘‘ ۔ وزیراعظم تینا ٹویٹ اٹی پارے کہ یوم نسواں نا وخت آ نن گودی فاطمہ جناح ءِ سلام عقیدت پیش کینہ ہرا قیام پاکستان نا جہد اٹی قائد تون سلیس۔ اوپارے کہ نن زالبول آتے کن رکھ و سازگار چاگڑد اس تننگ نا عہدنا تجدید ءِ کینہ تانکہ او تینا بود انا رداٹ قومی جوڑ جاڑ و شونداری ٹی تینا بشخ ءِ شاغنگ کیر۔
