کوئٹہ۔ 07 مارچ (اے پی پی) وزیراعلیٰ بلوچستان جام کمال خان پارینے کہ آبادی نا نیمہ بشخ زالبول آ تیا تالان ءِ و نیمہ بشخ ءِ گوجالسا ملک شون ہلنگ کپک۔ زالبول آتا جہانی دے انا وخت آ تینا اسہ کلہو اسے ٹی وزیراعلیٰ پارے کہ راج انا پسماندگی ءِ مر کننگ و اوفتے شونداری نا کسر آ روان کننگ المی ءِ کہ زالبول آتا شرف و غٹ معاملہ غاتے ٹی اوفتا حق آتا رکھ ءِ المی جوڑ کننگے۔ اوپارے کہ حکومت زالبول آتا حق انا پورو شرف ءِ کیک و زالبول آتے بریبر نا شاری نا حیثیت تننگ نا غرض اٹ بلوچستان اسمبلی ٹی کانود سازی اس ہم کننگانے ہراٹی میرات نا کانود نا رداٹ زالبول ءِ اوفتا بشخ انا گدریفنگ نا رکھ انا کانود ہم اوار ءِ، وزیراعلیٰ پارے کہ زالبول آک معاشی سرجزآتے ٹی ہم بشخ ہلنگ نا پبی لائخی تخرہ خاص کر بلوچستان نا زالبول آک کشیدہ کاری و اُرائی صنعت آتے ٹی کاریم کرسا تینا خاہوت آتے ولیفنگ ءُ وخت اس کہ اوفتا تیار کروک مصنوعات آک جہانی کہول آ ہم شہرت تخرہ ، حکومت زالبول آتا تیار کروک مصنوعات آتا مارکیٹنگ کن پبی کمک فراوان کیک دا بابت محکمہ وویمن ڈویلپمنٹ ءِ زالبول آتے کن مخصوص ءُ مارکیٹ اسے نا جوڑ کننگ نا ڈٹ اس تیار کننگ نا پارت کننگانے ، وزیراعلیٰ پارے کہ ملازمت آتے ٹی زالبول نا جتا کوٹہ غا عملدرآمد و اوفتے کن کاریم کننگ نا گچین ءُ چاگڑد اس تننگ ءِ المی جوڑ کرسا زالبول نا لائخی تیان پبی فائدہ ہرفنگک و صوبہ نا لائخ زالبول گوازی گر آتے ہم پبی سرپرستی ءِ جاری تخنگک، اوداعزم انا درشانی ءِ کرے کہ آئین و کانود نا رداٹ زالبول نا حق انا رکھ و شرف ءِ سوگو کننگ کن صوبائی حکومت ہروڑاٹ کیک۔
