اسلام آباد۔ 07 مارچ (اے پی پی) بنجائی کابینہ ملک اٹی ساڑی حالیت آتے ٹی جوڑ اتفاق رائے ءِ جاری تخنگ نا عزم انا اعادہ ءِ کرینے وخت اس کہ وزیراعظم عمران خان پارینے کہ حکومت قومی سلامتی نا معاملہ غاتیا ہراوڑ غٹ ادارہ غاتون اوار چلینگ انگ ءِ ہنداوڑ اپوزیشن ءِ ہم اوار ہلسا کانہ۔ اوحکومت پنجاب ءِ پارت تسنے کہ نواز شریف ءِ درمان نا گچین آسراتی تننگے، او ہرا ڈاکٹر یا ہسپتال آن درمان کننگ خواہک اودے ہمونگیا گدریفنگے و میڈیکل بورڈ انا سلاہ و سوج آتیا پورو عملدرآمد کننگے، جاگہ اس ہم بایدے داشائبہ مف کہ حکومت انتقامی کارروائی کننگ ءِ۔ بنجائی کابینہ عاصم سعید ءِ ایم ڈی پاکستان سافٹ ویئر بورڈ و سید جاوید نا پاکستان ریونیو آٹومیشن لمیٹڈ (پرال) اٹی تعیناتی نا منظوری ءِ تس۔ پنچ شنبے نادے آ وزیراعظم نا کماشی ٹی بنجائی کابینہ نا دیوان آن پد پارلیمنٹ ہاؤ س نا پیشن میڈیا ءِ حوال تننگ اٹ بنجائی وزیر اطلاعات و نشریات فواد حسین چوہدری پارینے کہ حکومت نا نواز شریف و آصف علی زرداری تون ہچ ءُ جنگ اس اف ، اوفتیا کرپشن و وڈی خوری نا ہرا کیس آتے جوڑ کننگانے اوننا دور انا افس و نیب انا ادارہ و اوٹی تقرری ننا حکومت کتنے ، مسلم لیگ ن و پاکستان پیپلزپارٹی جتا جتا یا اواری اٹ نیب انا کمامدارآتا تقرری کریر ، داسہ کیس آک پختہ مننگ ءُ و دزگیری ہم مننگ ءِ ، اگہ دا خلقت ءِ بیرہ داخاطران ہلنگا کہ دا پارلیمانی لیڈر اوتو ولدا وخت اس ہم طاقتور نا احتساب مننگ کپک۔ بنجائی وزیر چوہدری فواد حسین پارے کہ وزیراعظم عمران خان اسہ سپرٹ اس مون آ تخسا حکومت پنجاب ءِ پارت کرینے کہ نواز شریف ءِ جوان ءُ ہسپتال و گچین ڈاکٹر آتا آسراتی فراوان کننگے، ننا انتقام نا ہچ ءُ رویہ اس اف و نئے نواز شریف تون ذاتی دشمنی اسے۔ اوپارے کہ بنجائی کابینہ ایئر بلیو ایئر لائن نا لیسن نا غٹ کانودی معاملہ غاک پورو مننگ آ باقاعدہ منظوری ءِ تسنے۔
