اسلام آباد۔ 07مارچ (اے پی پی) وزارت ڈٹ بندی ، شونداری و اصلاحات نا کمامدارآک پارینو کہ 2018-19 ء ٹی سرکاری بشخ انا شونداری پروگرام تے کن 800 ارب روپئی جتا کننگاسس وخت اس کہ حکومت نظرثانی آن پد 675 ارب روپئی جتا کرے ہراٹی سی پیک پروجیکٹ آتے کن ہچ ءُ کٹوتی اس کننگتو۔ کمامدارآک پاریر کہ حکومت 24 ارب روپئی نا فنڈ سی پیک آن کانود ساز آتا اسکیم آتے کن تننگ نا بارواٹ اخبار آتے ٹی شینک مروک آ خبر آتا سختی اٹ تردید ءِ کرینے ۔ اوپارے کہ دا حوال آتے ٹی ہچ ءُ راستکی اس اف و دا گمراہ کروک اونو۔ پبلک سیکٹر ڈویلپمنٹ پروگرام نا ستمبر 2018 ء ٹی جاچ ءِ ہلنگا ہراٹی وزارت ڈٹ بندی، شونداری و اصلاحات سی پیک تون اوار ایلو شونداری ڈٹ آتے کن 27 ارب روپئی جتا کریسس ہرانا مسخت ملک انا گیشتری زند انا آب ءِ گچین جوڑ کروئی ئسک۔ دا بجٹ تعلیم، جان جوڑی، سفاءُ کنوئی ءُ دیر، کھیت آن منڈی اسکان روڈ آتا گچینی، گیس ، بجلی تون اوار ایلو ڈٹ آتے کن جتا کننگاسر تانکہ پائیدار شونداری نا ہدف آتا دوئی کننگ ءِ المی جوڑ کننگ مرے۔ ترجمان وزارت ڈٹ بندی پارے کہ دا پروگرام ہندی خلقت نا است خواہی تا رداٹ پائیدار شونداری ہدف آتا دوئی کننگ اٹ کمک ایتک۔بروک آ مالی سال آن حکومت علاقائی بریبری شونداری نا پن اٹ صوبائی حکومت آتا سلابت اٹ اسہ پروگرام اس بناکیک ہرانا مسخت ملک انا کم شون ہلوک ضلع غاتا بریبری و بریبر شونداری ءِ المی جوڑ کننگک۔ ترجمان وزارت ڈٹ بندی وضاحت کرے کہ سی پیک آن تعلقدار ڈٹ آتا وسیلہ غاتے ٹی ہچ ءُ بدلی اس کننگتنے و پائیدار شونداری ہدف آتا دوئی کننگ نا پروگرام اسہ کنڈآن شاری تا گرج آتے پورو کننگ نا اسہ ذریعہ اس ءِ و ایلو اقوام متحدہ تون کروک آ وعدہ غاتے پورو کننگ اٹی ہم کمک رسینگک۔
