اسلام آباد۔ 07 مارچ (اے پی پی) پاکستان سٹیزن پورٹل نا کنڈآن السی غاو تا ازالہ ترندی اٹ برجاءِ، 282 ورناتا غاوتا رداٹ وظیفہ غاتا مد اٹی 29,000 ورناتا واجب الادا پیسہ غاتے جاری کننگا۔ وزیراعظم آفس نا کنڈآن جاری بیان نا رداٹ وزیراعظم وظیفہ غاتا مد اٹی ورناتے کن مارچ 2018 ء آن پدسلوک واجب الادا پیسہ غاتا جاری کننگ نا فیصلہ کرے۔ ہراڑکن ورناک پدریسہ دردر نا ٹوکر کنگورہ۔ دارداٹ 941 ملین روپئی نا ادائیگی نا پرمان جاری مننگ آ وزارت خزانہ سلوک آ پیسہ غاتے کن زر جاری کرے سلوک آ پیسہ غاتا ادائیگی ٹی پاکستان سٹیزن پورٹل نا کلیدی کڑد انا سوب 29,000 ورناتے کن زر انا منظوری دوئی کننگا۔ 29,000 ورناتے اوفتا سلوک آ پیسہ غاک ہندا ہفتہ ٹی تننگرہ۔ بیان اٹی پاننگانے کہ حکومت پاکستان و وزیراعظم پرفارمنس ڈیلیوری یونٹ دا ہیت ءِ حساسیت آن جوانی اٹ بلد ءِ کہ پاکستان نا اصل میرات اونا ورناک ءُ و اوفتا ویل آتے ایسر کننگ آن بیدس شونداری مننگ کپک۔ ہراسوب آن او وزیراعظم نا مون آ داویل ءِ تخا، وزیراعظم عمران خان نا ویژن آ عمل کرسا پرائم منسٹر ڈیلیوری یونٹ دُن انگا ہر تپہ نا ویل آتا ایسری کن کوشست کرسا کیک۔
