اسلام آباد۔ 07 مارچ (اے پی پی) چیئرمین سینیٹ محمد صادق سنجرانی پارینے کہ کانود سازی و کانود آ عملدرآمد کن تعلقدار آئینی ادارہ غاتا نیام اٹ رابطہ غاتے پین سوگو کننگ نا گرج ءِ۔ ایوان بالا بنچ و بار ءِ مون تروک ویل آتا ایسری کن پبی کڑد ادا کننگ ءِ و ملک اٹی عدالتی نظام ءِ پین فعال کننگ و پدسلوک مقدمہ غاتے زوت آن زوت ایسر کننگ نا عزم انا پبی تائید ءِ کیک۔ داخیال آتا درشانی ءِ چیئرمین سینیٹ اسلام آباد ہائی کورٹ بار انا پوسکن گچین مروک آ صدر راجہ انعام امین منہاس تون پارلیمنٹ ہاؤس اٹی اوڑدہی ٹی کرے۔ چیئرمین سینیٹ پارے کہ دا ہیت ستاکڑزک کہ انصاف نا دمدستی فراوانی کن عدلیہ، بار ایسوسی ایشن و آئین ساز ادارہ غاتا نیام اٹ ہم گرنچی ءِ۔ چیئرمین سینیٹ پارے کہ اسلام آباد ہائی کورٹ بار ءِ مون تروک ویل و اسلام آباد ہائی کورٹ نا بابت معاملہ غاتا بابت بھاز زوت بار انا ڈل اتون اوڑدہی کیک ہراٹی مون تروک ویل آتا سرجم اٹ جاچ ءِ ہلنگک۔ صادق سنجرانی اسلام آباد ہائی کورٹ بار انا پوسکن گچین مروک آ صدر ءِ مبارکبادی ترسا اومیت پاش کرے کہ او عدلیہ ، وکلاء و آئین ساز ادارہ غاتا نیام اٹ رابطہ غاتے پین مون آ دننگ کن تینا کڑد ءِ ادا کیک و وکیل آتا ویل آتے تالان کننگ و اوفتا ایسری کن کوشست کیک۔
