اسلام آباد۔07مارچ(اے پی پی) دری کارانی وزیر شاہ محمود قریشی ءَ گشتگ کہ پاکستان بھارت ءَ گوں دونیمگی جیڑہ ءَ گیشءُ گیوار کنگءَ میڑءُ مرّکا ءَ کرد پیش کنگءِ ھاترءَ یورپین یونین ءِ کردءَ را ساڑاہیت۔ اے گپ آئیءَ پنچ شمبے ءِ روچءَ لکسمبرگ ءِ دری کارانی وزیر جین ایزلبورن ءَ گوں گندءُ نندءَ پد یکجاہی پریس کانفرنسءَ گوں تران کنان ءَ کتگ۔ شاہ محمود قریشی ءَ گشتگ کہ پاکستان ءُ لکسمبرگ ءِ نیامءَ ڈلی تکءَ دونیمگی ھدوکی، دونیمگی بیپاری ءُ زرکاری ءِ ہوالگءَ گپءُ تران بوتگ۔ ایشی ءَ ابید پاکستان ءِ ایف اے ٹی ایف سٹیٹس ، پلوامہ اُرش ءَ پد جاورحال ءُ اوگان امنءُ ایمنی عمل ءِ سرءَ باستءُ واست کنگ بوتگ۔ لکسمبرگ ءِ دری کارانی وزیر ءَ دوئیں ملک آنی نیامءَ کستءُ کینگ ءَ را کم کنگءَ پاکستانءِ کردءَ را ساڑاتگ ءُ بھارتی پائلٹ ءِ یل کنگءِ مزن وزیر عمران خان ءِ شگرءُ منت گپتگ۔
