حکومت ملک اٹی زرکارآتے کن سازگار و کاروبار دوست چاگڑد اس تننگ ءِ اولیت ایتک، وزیراعظم عمران خان

اسلام آباد۔ 06مارچ (اے پی پی) وزیراعظم عمران خان پارینے کہ حکومت ملک اٹی زرکار آتے کن سازگار و کاروبار دوست چاگڑد اس فراوان کننگ ءِ اولیت ایتک ، 50 لکھ اُراتاتفنگ حکومت نا فلیگ شپ پروگرام ءِ ہراڑان ملک انا ورنا و تعلقدار صنعت آتے کن پوسکن ءُ وارخواہی ودی مریک۔ اوداہیت ءِ چین نا پنی آ کمپنی ایکس سی ایم جی نا گلوبل سیلز پریذیڈنٹ /جنرل منیجر ڈاکٹر ہینسن لیو و ایچ ایس ایس پڑک نا چیئرمین سید سمن ہاشمی تون گپ و تران کرسا پارے ہرافک چارشنبے نادے آ وزیراعظم آفس اٹی اوڑتون اوڑدہی کریر۔ ایچ ایس ایس و ایکس سی ایم جی کمپنیک پاکستان نا ہاؤسنگ و مینو فیکچرنگ نا بشخ اٹی 2 ارب ڈالر نا زرکاری نا ارادہ تخرہ۔ ایکس سی ایم جی کمپنی جوڑ جاڑی صنعتی گڑا و مشینری نا بابت چین نا اولی کمپنی تے ٹی شمار مریک ہرا پاکستان اٹی ہیوی ایکیوپمنٹ مینو فیکچرنگ پلانٹ/اسمبلی اس جوڑ کننگ نا ہم ارادہ تخک۔ دا کمپنی بلند و بالا ماڑی و ہاؤسنگ یونٹ آتا جوڑ کننگ اٹ چاہندار ی تخک و وزیراعظم نا 50 لکھ اُراتا تفنگ نا پروگرام اٹی شریدار مننگ نا خواہندار ءِ ۔ وزیراعظم ایچ ایس ایس و ایکس سی ایم جی نا کنڈآن ہاؤسنگ و مینو فیکچرنگ نا بشخ اٹی زرکاری نا خیرمقدم ءِ کرسا پارے کہ حکومت زرکار آتے زیات آن زیات آسراتی تننگ و کاروبار اٹی آسانی ودی کننگ کن کیہی گام گیج کرینے۔