اسلام آباد۔ 06مارچ (اے پی پی) صدر مملکت ڈاکٹر عارف علوی ورناتے پوسکن آ دور انا خواست آتا رداٹ ڈیجیٹل کمیونیکیشن نا پڑ اٹی دوئی وارخواہی تیان فائدہ ہرفنگ و پوسکن آ پاکستان نا مسخت آتا دوئی کننگ کن سائنس و ٹیکنالوجی نا بشخ آتے ٹی مون آ ہِننگ آ زور شاغسا پارینے کہ پاکستان سائنس نا بشخ اٹی ترندی اٹ شون ہلنگ ءِ۔ جامعہ غاک تعلیمی نصاب ءِ جہانی آب انا رداٹ جوڑ کیر وخت اس کہ ننے چندی بشخ آتے ٹی ٹیکنالوجی نا کاریم اٹ اتنگ ءِ پین مون آ دننگ نا گرج ءِ۔ اوداہیت ءِ چارشنبے نادے آ داڑے بحریہ یونیورسٹی ٹی مواصلات ، کمپیوٹنگ و ڈیجیٹل نظام نا بارواٹی اِرادے ئی کانفرنس نا بنائی نشست آن تران کرسا پارے۔ صدر داہیت آ زور شاغا کہ جامعہ غاک تعلیمی نصاب ءِ جہانی آب انا رداٹ جوڑ کیر و پوسکن آ خواست آتیان ہم گرنچ کیر۔ اوپارے کہ دار داٹ ورناتے بروک آ وخت انا گرج آتا رداٹ تیار کننگے تانکہ او زند انا ہر بشخ اٹی تینا جوان ءُ کڑد اس ادا کننگ کیر۔ ڈاکٹر عارف علوی پارے کہ پاکستان سائنس نا پڑ اٹی ترندی اٹ شون ہلنگ ءِ ۔ ننے گچین کاری عمل تون اوار چندی بشخ آتے ٹی ٹیکنالوجی نا کاریم اٹ اتنگ ءِ پین مون آ دروئی مریک ۔ اوپارے کہ سائنس و مواصلات نا بشخ آتے ٹی انقلاب اس بسنے و پوسکن آ ٹیکنالوجی آن مواصلاتی رابطہ غاتے ٹی بھاز آسانی ودی مسنے۔ دے تا کاریمک منٹ آتے ٹی مننگ ءُ۔ او سائنس و مواصلات تون تینا متکن آ ناطہ غاتا ذکر ءِ کرسا پارے کہ ای نظام زند اٹی مدام پوسکن آ ٹیکنالوجی نا کاریم اٹ اتنگ ءِ اولیت تسٹ۔ کسبی زند اٹی ہم سائنس میگزین نا مطالعہ کنا شوق ئس۔ صدر پارے کہ او1980 ء نا دہائی نا اول آن کمپیوٹر ءِ کاریم اٹ اتنگ نا بناءِ کریٹ و اوکان پد تنظیمی معاملہ غاتے ٹی رابطہ کن سمارٹ فون ءِ کاریم اٹ اتسا کریٹ و ہنداوڑ ہردے ئی زند اٹی پوسکن آ ٹیکنالوجی نا کاریم اٹ اتنگ اونا اولیت ئس۔ صدر دا اہم انگا سرحال آ کانفرنس نا سرسہب اڈتننگ آ بحریہ یونیورسٹی ءِ مبارکبادی ترسا پارے کہ سائنس و ٹیکنالوجی ، ڈیجیٹل سسٹمز و مواصلات نا بشخ آتیا چکار کننگ وخت انا خواست ءِ۔ دارادٹ کانفرنس نا اڈتننگ ستاکڑزک۔ ہراڑان خاص کر ورناتے ہیل کننگ و فائدہ ہرفنگ نا موقع دوبریک۔
