بنجائی وزیر ریلوے شیخ رشید احمد نا اسلامی جمہوریہ ایران تون ریل انا بشخ اٹی ہڑتوم آ کنڈآتا کمکاری ءِ سوگو کننگ آ زور
تہران /اسلام آباد۔06مارچ (اے پی پی) بنجائی وزیر ریلوے شیخ رشید احمد اسلامی جمہوریہ ایران تون ریل انا بشخ اٹی ہڑتوم آ کنڈآتا کمکاری ءِ سوگو کننگ آ زور شاغسا پارینے کہ پاکستان، ایرانی ریلوے نیٹ ورک انا کمک اٹ تینا مصنوعات آتے یورپی ریاست آتے ترسیل کننگ کیک۔ داخیال آتا درشانی ءِ او چارشنبے نادے آ ایران نا دورہ نا وخت آ ایران نا سرکاری نیوز ایجنسی ’’ارنا‘‘ نا نمائندہ ءِ خصوصی انٹرویو ترسا کرے۔ اوپارے کہ نن ایران نا ریلوے لائخی تا کمک اٹ تینا گڑاتے یورپ و نیامی ایشیائی ملک آتے گدریفنگ کینہ۔ او دا است خواہی نا درشانی ءِ کرے کہ ایران و پاکستان تفتان، کوئٹہ و چاہ بہار،گوادر نا نیام اٹ ریلوے لین نا جوڑ کننگ کن مثبت کمک کیر۔ شیخ رشید دا سوج انا ورندی ٹی پارے کہ پاکستان تینا مصنوعات آتا ترسیل کن ایران نا ریلوے نیٹ ورک آن فائدہ ہرفنگ خواہک، پارے کہ بالکل ، انتئے آخا۔ اوپارے کہ پاکستان ، ایران تون ہڑتوم آ کنڈآتا تعلقداری تے ودفنگ خواہک، تدوک آ 70 سال اٹی دا وارخواہی تیان فائدہ ہرفنگتنے، ہڑتوم آ ملک آک اسہ ایلو نا ہمسایہ ءُ، ہنداخاطران ہڑتوم آ کنڈآتا سفر خاص کر زائر آتا ہن و بر ءِ ہرسا وخت انا خواست ءِ کہ ریلوے بشخ اٹی تین پہ تینی کمکاری ءِ مون آ دین۔ شیخ رشید احمد دا ہیت آ زور شاغا کہ ایران و پاکستان ءِ اواری اٹ تولسا تفتان ، کوئٹہ و چاہ بہار ، گوادر بندرگاہ نا نیام اٹ ریلوے لین نا جوڑ کننگ کن کمک کروئی مریک۔ اومستی پارے کہ پاکستان ایرانی کمامدارآتیان خواست کرینے کہ زاہدان ، تفتان ریلوے نا گچینی کن زرکاری کیر ہراڑا ایرانی کمامدارآک کمکاری نا باوری ترفینو۔ بنجائی وزیر ریلوے پارے کہ او دورہ ایران نا وخت آ پاکستان نا بڑزکو سرکڑدہ غاتا اہم ءُ کلہو اسے سپریم لیڈر ایران و صدر مملکت ءِ رسیفک۔ شیخ رشید پارے کہ اونا تدوک آ دے تینا ایرانی ہم منصب محمد اسلامی تون اوڑدہی مس ۔ داوخت آ جوڑ جاڑی مذاکرات مس و زیات تر ریلوے لین اٹی اسیجا کمکاری ءِ ودفنگ آ گپ و تران مس۔ اومستی پارے کہ قائد اسلامی انقلاب آیت اللہ خامنہ ای و صدر مملکت ایران ڈاکٹر حسن روحانی تون مروک آ اوڑدہی تیٹی پاک۔ ایران تعلقداری، علاقائی ویل و عالم اسلام نا معاملہ غاتیا گپ و تران مریک۔
