وزیراعظم عمران خان نا پارت آ بجلی دُزی ءِ ماس کش کرسا لوڈشیڈنگ ءِ پورو وڑاٹ ایسر کینہ
ہری پور۔ 05مارچ (اے پی پی) بنجائی وزیر توانائی عمر ایوب خان پارینے کہ وزیراعظم عمران خان نا پارت آ بجلی دُزی ءِ ماس کش کرسا لوڈشیڈنگ ءِ پور و وڑاٹ ایسر کینہ۔او ہری پور نا علاقہ شادی حطار و کامل پور اٹی گیس فراوانی ڈٹ آتا بناءِ کننگ آن پد السی مچی آن تران کریکہ۔ تحریک انصاف نا راہشون یوسف ایوب خان و چیئرمین ڈیڈک کمیٹی ایم پی اے ارشد ایوب خان ئسک ہم اوڑتون اوار ئسر۔ عمر ایوب خان پارے کہ ہری پور اٹی بجلی نا پوسکن آ دہ فیڈر آ کاریم برجاءِ، بروک آ یک شنبے آ پنجا کروڑ روپئی نا خڑچ آن خان پور اٹی گریڈ اسٹیشن نا جوڑ کننگ نا ڈٹ انا بناءِ کننگک۔ سرائے صالح ٹی ہنداخہ ہی خڑچ آن گریڈ اسٹیشن و 8 ءُ نیم ارب روپئی نا خڑچ آن حطار اٹی دوسد ءُ بیست وولٹ انا گریڈ اسٹیشن نا منظوری ءِ ہم دوئی کننگانے۔ بجلی نا دا ڈٹ آتا پوروی آن ضلع ٹی بروک آ پنجا سال اکن بجلی نا ویل آک ایسر مریرہ۔ اوپارے کہ او وزیراعلیٰ تون اوڑدہی کرسا ڈی ایچ کیو ءِ اے گریڈ ہسپتال اٹی بدل کننگ و اسہ میڈیکل کالج اسے نا منظوری ءِ دوئی کرینے اوکان پد الس ءِ جان جوڑی نا آسراتی تا فراوانی ٹی مروک آ مشکل آک ہم چٹرہ۔
