اسلام آباد۔ 05مارچ (اے پی پی) کابینہ نا اقتصادی رابطہ کمیٹی (ای سی سی) وزارت داخلہ نا چندی ڈٹ آتے کن 76 کروڑ 88 لکھ روپئی آن زیات و پاکستان بناؤ سرٹیفکیٹس کن بینک آتا کنسور شیم نا خذمت دوئی کننگ کن 18 کروڑ روپئی نا ٹیکنیکل سپلیمنٹری گرانٹ نا منظوری ءِ تس۔ ای سی سی نا دیوان سے شنبے نادے آ بنجائی وزیر خزانہ اسد عمر نا کماشی ٹی مس۔ دیوان اٹی وزارت داخلہ نا کنڈآن چندی آسراتی تا جوڑ کننگ و جوڑ جاڑ کن ٹیکنیکل سپلیمنٹری گرانٹ تننگ نا سلاہ پیش کننگاسس۔ دا سپلیمنٹری گرانٹ اسلام آباد ہائی کورٹ اٹی سی سی ٹی وی کیمرہ غاتا جوڑ جاڑ و بدلی، اسلام آباد کیپیٹل ٹیریٹری ٹی سیکورٹی وہیکل آتا خڑچ آک، ای۔ پاسپورٹ پروجیکٹ و بجلی نا بل آتا ادائیگی نا بابت ءِ۔ ای سی سی وزارت بحری امور نا کنڈآن پورٹ قاسم آ ودکی ایل این جی ٹرمینل اس جوڑ کننگ نا سلاہ نا جاچ ءِ ہلک و پارت کرے کہ دا معاملہ غا کاریم نا رفتار ءِ ترند کننگے و بروک آ یخ انا موسم آن مست پوسکن آ ٹرمینل نا تفنگ نا غٹ خواست آتے پورو کننگے۔ ای سی سی مٹیاری ڈسٹرکٹ اٹی ففضل فیلڈ آن 9 ایم ایم سی ایف ڈی گیس سوئی سدرن گیس کمپنی لمیٹڈ کن جتا کننگ نا ہم منظوری ءِ تس۔ دیوان اٹی پاکستان بناؤ سرٹیفکیٹس کن بینک آتا کنسور شیم نا خذمت آتے دوئی کننگ نا چرجوئی ٹی 18 کروڑ روپئی نا ٹیکنیکل سپلیمنٹری گرانٹ نا ہم منظوری ءِ تس۔
