اسلام آباد۔ 05مارچ (اے پی پی) چیئرمین سینیٹ صادق سنجرانی تون وزیر مملکت موسمیاتی بدلی زرتاج گل سے شنبے نادے آ داڑے اوڑدہی کرینے۔ داوخت آ چیئرمین سینیٹ ءِ مچ آ ملک اٹی چاگڑد نا گچینی و موسمیاتی بدلی تا خراب انگا زہم تا توننگ کن کروک آ گام گیج آتیان معلومدار کننگا۔ زرتاج گل پارے کہ وزیراعظم نا وژن نا رداٹ مچ آ ملک اٹی شجر کاری ءِ اولیت تننگ انگ ءِ۔ داوخت آ گپ و تران کرسا چیئرمین سینیٹ پارے کہ چاگڑد نا گچینی کن مچ آ ملک اٹی کروک آ کوشست آتے سوگو کننگ نا گرج ءِ، ایوان بالا چاگڑد نا گچینی نا کوشست آتے ٹی لگوک ءِ۔ اوپارے کہ موسمیاتی بدلی نا بابت قائمہ کمیٹی آن بیدس اسہ خصوصی ءُ کاکس اس ہم جوڑ کننگانے۔ چیئرمین سینیٹ پارے کہ ایوان بالا صوبہ غاتا نیام اٹ گچین ہم گرنچی و غٹ تعلقدار ادارہ غاتا سلاہ ءِ مون آ تخسا مچ آ ملک اٹی چاگڑد نا رکھ اکن ٹھوس سلاہ ایتک، صوبہ غاتا نیام اٹ گچین ہم گرنچی نا کمک اٹ ساف ستھرا چاگڑد نا بابت آگاہی ودی کننگ مریک۔ اوپارے کہ ملک انا پدسلوک و کم سرسوز علاقہ غاتے ٹی شجر کاری ءِ اولیت تننگے۔
