پبلک پرائیویٹ پارٹنر شپ انا رداٹ گلگت بلتستان اٹی پدریسہ سمارٹ میٹر و سمارٹ کیبل نا نظام اس خلنگک، قدرتی آفت یا ہلہلئی حالیت آتے مون آ تخسا پین 13 میگاواٹ نا تھرمل جنریٹر ہلنگ نا فیصلہ ءِ کننگانے، وزیراعلیٰ حافظ حفیظ الرحمان
گلگت۔ 05مارچ (اے پی پی) وزیراعلیٰ گلگت بلتستان حافظ حفیظ الرحمان پارینے کہ پبلک پرائیویٹ پارٹنر شپ نا رداٹ گلگت بلتستان اٹی پدریسہ سمارٹ میٹرز و سمارٹ کیبل نا نظام خلنگک، اقبال ٹاؤن(کنوداس) گلگت اٹی سمارٹ میٹر آتا پائلٹ پروجیکٹ بے کچ سرسہب مسنے، ہرانا گچین ءُ بھرم مون آ بننگ ءِ، سمارٹ میٹر وسمارٹ کیبل نا سسٹم اس خلنگ نا سوب آن گلگت نا چندی علاقہ غاتا نسبت اقبال ٹاؤن(کنوداس) اٹی بجلی نا لوڈشیڈنگ نا وخت ءُ پاس بے کچ کم ءِ و بجلی نا وولٹیج نا ویل ہم آخبتی بندا و تیا ایسر مسنے ہرانا سوب آن گلگت نا ایلو علاقہ غاتا الس ہم سمارٹ میٹر و سمارٹ کیبل نا نظام نصب کننگ نا خواست ءِ کننگ ءُ۔ گلگت بلتستان حکومت اولیکو وار پبلک پرائیویٹ پارٹنر شپ انا رداٹ دا اہم ڈٹ آتے پورو گلگت بلتستان اٹی خلنگ نا فیصلہ کرینن ہراڑکن کاغدی کارروائی پورو مسنے و بھاز زوت دا ڈٹ آتا ٹینڈر ءِ مشتہر کننگک وخت اس کہ گلگت بلتستان اٹی ہر وڑنا قدرتی آفت یا ہلہلئی حالیت آتے مون آ تخسا پین 13 میگاواٹ نا تھرمل جنریٹرہلنگ نا فیصلہ کننگانے ، اوکان پد 29 میگاواٹ تھرمل جنریٹر بیک اپ نا لائخی ساڑی مریک۔ وزیراعلیٰ گلگت بلتستان حافظ حفیظ الرحمان صوبائی سیکرٹری برقیات عبدالوحید شاہ ءِ پارت کرینے کہ اسہ ہفتہ ٹی بلنگ نا نظام ءِ آن لائن کمپیوٹرائز کننگے، پوسکن آ بجلی کنکشن دوئی کروک آتے میونسپل و کونسل آن جاگہ نا منظور مروک نقشہ و این او سی ءِ المی گوندنگے، صارف آتے بجلی نا بل آتا وخت آ فراوانی نا بابت غاو ملنگ ءِ، سیکرٹری برقیات بل آتا فراوانی نا نظام ءِ پین شفاف و وخت آ کننگ کن گام گیج کے تانکہ وخت آ بجلی نا بل آتا ادائیگی مننگ کے۔ داخیال آتا درشانی ءِ او محکمہ برقیات نا کنڈآن گلگت بلتستان اٹی سمارٹ میٹرو سمارٹ کیبل نا نظام نا خلنگ نا بابت تروک آ حوال نا وخت آ گپ و تران کرسا کرے۔ وزیراعلیٰ گلگت بلتستان حافظ حفیظ الرحمان پارے کہ غٹ سرکاری محکمہ غاتے وخت آ بل آتا ادائیگی ءِ المی کننگ نا پابند کننگے، سمارٹ میٹر و سمارٹ کیبل نا نظام نا خلنگ آن بجلی نا ساڑی پیدوار نا رداٹ ہم گلگت نا الس ءِ 12گھنٹہ آن زیات بجلی نا فراوانی ءِ المی کننگ مریک و بجلی نا وولٹیج نا ویل ہم آخبتی بنداو تیا ایسر مننگ کیک ۔ دا ڈٹ انا فائدہ و اہمیت ءِ مون آ تخسا پبلک پرائیویٹ پارٹنر شپ انا رداٹ گلگت بلتستان اٹی دا ڈٹ ءِ ودفنگ نا فیصلہ کننگانے ہراڑکن نیشنل و انٹرنیشنل فورم آتے سلہ خلنگک تانکہ سرسہبی اٹ سمارٹ میٹر و سمارٹ کیبل نا ڈٹ ءِ گلگت بلتستان اٹی خلنگ مرے ہراڑان بجلی تنکی نا بھلو حد اسسکان مون ءِ توننگ اٹ کمک رسینگک۔ وزیراعلیٰ گلگت بلتستان حافظ حفیظ الرحمان پارے کہ محکمہ روایتی وڑوڈول آتے اٹ کاریم کننگ نا جاگہ غا پوسکن آ وڑوڈول آتیا کاریم کننگ کن گام گیج کے، گلگت بلتستان اٹی ہرقدرتی آفت یا ہلہلئی حالیت آتے مون آ تخسا پین 13 میگاواٹ نا تھرمل جنریٹر ہلنگ نا فیصلہ ءِ کننگانے ، اوکان پد 29 میگاواٹ تھرمل جنریٹر بیک اپ نا لائخی ساڑی مریک۔ وزیراعلیٰ گلگت بلتستان حافظ حفیظ الرحمان نلتر واٹر ٹینک ءِ زوت آن زوت جوڑ جاڑ کننگ و بجلی نا ترسیل ءِ المی جوڑ کننگ نا ہم پرمان تس۔
